Здружението за меѓународна политика „Совет на Амбасадори“ го поздрави реафирмирањето на европската перспектива на земјите од Западен Балкан во францускиот нон-пејпер доставен до земјите членки на Унијата.
Во денешното соопштение од здружението истакнаа дека високо ја ценат констатацијата изнесена во нонпејперот дека блиските врски со ЕУ се единствениот пат земјите од Западен Балкан да изградат или ги консолидираат државите врз основа на владеењето на правото и економскиот и социјалниот развој.
„’Советот на Амбасадори’ е убеден дека за да се постигнуваат тие цели потребно е земјите членки на Унијата преку разни форми и инструменти да ги поддржуваат европските аспирации и достигнувања на земјите кандидати, што не беше случај на последниот Самит на Европскиот совет одржан во октомври оваа година“, се наведува во соопштението.
Процесот на проширувањето, стои меѓу другото во дописот до јавноста, не е единствениот што ја прави Унијата неефикасна и „речиси неуспешна во однос на глобалните предизвици на времето, како што се глобалните економски кризи, европската одбрана и безбедност, борбата против светскиот тероризам и бегалските кризи кои и се наметнуваат на Европа како резултат на нестабилноста на цели региони во светот“.
„Ние ја прифаќаме како ,реалност констатацијата дека на Европската Унија и се потребни длабоки реформи во многу области, вклучувајќи го тука и областа на проширувањето, но сметаме дека проширувањето не треба да запре се додека не завршуваат посакуваните реформите кои во теорија и пракса се долги процеси на преговарања и договарања внатре во Унијата сè до нивно конечно усвојување. Ние сметаме дека проширувањето и реформите би требало да бидат паралелни процеси, наведува здружението.
Поранешните македонски амбасадори се со став дека определбата на Франција изразена во нон-пејперот оти проширувањето како процес во иднина треба да оди побавно и поквалитетно, нема основа во реалноста, оти не секогаш само процесите кои траат долго се поквалитетни, бидејќи таквиот пристап може да донесе и спротивни резултати.
„Проширувањето за Република Македонија беше речиси дводецениски евроинтеграциски процес на уцени, надежи, преговарања и договарања, исполнување на реформи за на крај времено да заврши со неуспех преку неправедно блокирање на тој процес од страна на само една земја членка. Сметаме дека ќе биде од корист процедурата на групирање на темите во преговарачки тематски блокови (како што стои во нон-пејперот) наместо досегашните многубројни поглавја. Исто така, сметаме дека овозможување на пристап до структурните фондови во областите каде ќе се постигне напредок од страна на земјите кандидати ќе го поттикнува и мотивира тој процес“, се додава во соопштението.
Воведувањето, пак, на принципот на реверзибилност ќе направи земјите кандидати похрабро да ги реализираат и имплементираат реформите во пракса, бидејќи со тоа акцентот ќе се става на индивидуалните заслуги и достигнувања на земјите кандидати, односно т.н. мерит систем, кој нема да биде зависен од геополитичките прилики и застојот во реформите во други земји кандидати, децидни се од Здружението.
Патем, „Совет на Амбасадори” ги поздрави залагањата на голем број земји членки на Унијата и на лидерите на европските институции ЕУ во март 2020 повторно да се наврати на одредувањето на датум за преговори за Република Северна Македонија и Република Албанија и се надева дека овој пат тој процес ќе биде успешен.
(Извор: МИА)
