Францускиот претседател, Емануел Макрон, и јорданскиот крал, Абдула Втори, вчера го повикаа Израел да ги укине сите копнени „ограничувања“ за испорака на хуманитарна помош во Газа, се вели во соопштението на францускиот претседателски кабинет.
На работниот ручек во Елисејската палата тие ја повторија „потребата да се воспостави, без дополнително одлагање, итен и траен прекин на огнот во Газа и уште еднаш повикаа на ослободување на сите заложници“, вклучително и на двајцата Французи.
Појасот Газа вчера беше повторно бомбардиран, откако израелскиот премиер објави дека „интензивната“ фаза на борби се ближи кон крајот, особено во Рафа, град на југот на палестинската територија, но дека војната против Хамас ќе продолжи.
Исламистичката група одговори дека секој каков било договор мора „да вклучува траен прекин на огнот и целосно повлекување на Израел од Газа“, услови што Израел досега секогаш ги отфрлуваше.
Лидерите на Франција и Јордан, исто така, „изразија длабока загриженост за ситуацијата на Западниот Брег и силно го осудија насилството кое таму го прават доселеници.
Макрон и кралот Абдула Втори се согласија дека „ќе продолжат заеднички да работат на трајно и веродостојно решение за кризата засновано на решение со две држави“.
„Во тој проект палестинската самоуправа мора да биде поддржана, а не да се ослаби“, нагласија, посочувајќи дека „каква било пречка за пренос на приходите на Самоуправата или нејзиниот банкарски систем е неприфатлива“.
Исто така ги поздравија „реформите кои ги покренала палестинската влада и повикаа на нивно продолжување и продлабочување“.
Осврнувајќи се на зајакнувањето на тензиите на израелско-либанската граница, предупредија на „распалување на оган што би било катастрофално за регионот“ и ги повторија повиците до сите страни на „одговорност и воздржаност“.
(Марин Лудович / АФП)
