„Состојбата во Дебар и во Центар Жупа каде што е прогласена кризна состојба поради коронавирусот ноќеска и претпладнево е мирна, без никакви инциденти и движење на населението. Преземени се сите мерки и активности за справување со ширењето на коронавирусот, а сите институции и експерти ангажирани за спроведување на акцискиот план за имплементација на одлуката за кризна состојба се на терен“, соопшти премиерот Оливер Спасовски на прес-конференција во Владата.
Тој ги повика граѓаните на двете општини да продолжат на таков начин
да даваат придонес за спроведување на сите мерки.
Формиран е Главен оперативен штаб за кризни состојби што ќе раководи со активностите со единствена цел справување со вирусот Ковид-19.
Спасовски посочи дека целите на акцискиот план се контрола и забавување на инфекцијата, заштита на здравјето и живот на граѓаните, материјалните добра и животната средина, зајакнување обезбедувањето на државната граница и контрола на лица кои доаѓаат од ризичните земји, вклучување и координација на надлежните институции, поголемо ниво на безбедност на патниот и товарниот сообраќај.
За спроведување на активностите задолжени се повеќе институции на
државно и на локално ниво: Министерството за здравство, МВР, општините Дебар и Центар Жупа, Армијата, ЦУК, ДЗС.
Во Дебар и Центар Жупа во сила е забрана за излегување освен во животно загрозувачка состојба и тоа со возило на брза помош и со дозвола од Министерството за здравство.
Воспоставен е режим на контрола на сообраќајот, дезинфекција на зафатеното подрачја, транспорт на неопходните намирници, енергенси и други потреби на граѓаните, а ќе бидат утврдени други мерки.
„Најважно да е почитуваат мерките, забраната на собири, домашна изолација и контакти со заболени или изолирани лица“, истакна Спасовски.
„На граѓаните на Дебар и Центар Жупа им порача да бидат уверени дека ова најдоброто решение што набргу ќе даде резултати. Ги замоли да нема поголема паника бидејќи е воспоставен организиран институционален систем кој води сметка за секој граѓанин. Во соработка со локалната самоуправа ќе бидат обезбедени сите најдобри здравствени мерки, како и услови за живот во кризни состојби. Ќе се обезбедат услови да функционираат производствените капацитети за храна, бензински пумпи, болници. Банките и комуналните служби и поштата ќе работат со скратено работно време“, истакна Спасовски.
„Уште еднаш апелира да се почитуваат препораките и мерките, да се следат информациите од официјални канали на комуникација и од институции. Има добро поставен систем кој може да се справи со оваа ситуација“, подвлече Спасовски.
Повика на одговорно однесување на секој поединец, зашто не е време за политичко профитерство на сметка на загрижените граѓани, сите да ги почитуваа препораките и воспоставениот систем, бидејќи, како што нагласи, со тоа најефикасно ќе биде надмината сегашната состојба.
