Кипарските власти вчера објавија дека спасиле 86 мигранти во неволја кои биле на брод во близина на југоисточниот брег на тој медитерански остров.
Од Заедничкиот координативен центар за помош соопштија дека операцијата за спасување донела на брегот 61 маж, шест жени и 19 деца, сите живи и здрави.
Патролен чамец на поморската полиција и два глисери учествувале во акцијата кај Р’тот Греко, во близина на приморското одморалиште Аја Напа, информираа од Центарот.
Сите тие треба да бидат префрлени во прифатен центар за мигранти кој се наоѓа во предградието на главниот град Никозија.
Информации за националноста на мигрантите и за местото на поаѓање на бродот не се објавени.
Во истото подрачје пред пет дена кипарските власти спасија 60 мигранти во неволја.
Бројот на мигранти кои пристигнуваат со брод е зголемен во 2023 година. Според податоците на островските власти, се работи за забележано зголемување од 60% во првите пет месеци во споредба со истиот период минатата година.
Повеќето од илегалните мигранти кои биле забележани на Р’тот Греко на бродовите се качиле во сириското пристаниште Тартус.
Тврдејќи дека се наоѓа на првата линија на миграциските текови во Европската унија, Кипар со години бара повеќе средства и политичка поддршка од Брисел за решавање на овој проблем.
Од април до јуни биле поднесени 2.381 барање за азил во таа земја.
Република Кипар има власт само над јужниот дел на островот, додека северниот дел од 1974 година и припаѓа на Турција.
Властите тврдат дека барателите на азил претставуваат 5% од 915.000 жители на јужниот дел на островот.
(Фото: АФП)
