На дневен ред на Владата на Србија наскоро би требало да се најде план за реформи на дипломатско-конзуларната мрежа, кој би можел да опфати затварање на повеќе амбасади и конзулати, но и отворање на нови претставништва во земји во Африка, Азија, Латинска Америка и карипскиот и пацифичкиот регион.
Српските медиуми информираат дека веќе неколку месеци во рамки на Министерството за надворешни работи се анализира економска и политичка оправданост на дипломатско конзуларните претставништва и дека при одлуката за евентуално отварање на нови „филијали“ или гасење на постоечките, државниот врв ќе применува три критериуми: големината на дијаспората, стопанскиот потенцијал на новите пазари и клучниот – зајакнување на присуството во земјите значајни за одбраната на Косово.
Проценката на државниот врв е дека Србија нема амбасади во некои за нив многу значајни држави, а кои не го признале Косово, како Виетнам, Венецуела, Чиле и Палестина.
Се разгледува инсталирање на амбасади и конзулати во Перу, Гана, Камбоџа, како и во карипскиот и пацифичкиот обрач.
Владата уште минатиот септември донесе одлука повторно да се отвори амбасада во Зимбабве, држава која исто така не застана на страната на Приштина.
Претседателот Александар Вучиќ пред неколку дена најави отварање на амбасада во Парамарибу, главниот град на Суринам, кој ја повлече одлуката за признавање на независноста на Косово.
Постојат и идеи Србија да го засили присуството во балтичките земји, затоа што Србија нема амбасади во Естонија, Литванија и Летонија.
Имало, споменуваат медиумите, предлози да се намали бројот на српските амбасади во земјите членки на Европската унија, но за сега е малку веројатно дека тука ќе има извесни радикални скратувања. Една од опциите е во скандинавските земји да се „инсталира“ една амбасада, која би ги покривала Данска, Шведска и Норвешка, а можно е и Финска.
