Претседателот на САД Доналд Трамп во петок во Вашингтон ќе се сретне со британската премиерка Тереза Меј, соопшти денес портпаролот на Белата куќа, Шон Спајсер.
Спајсер вели дека Тереза Меј ќе биде прв странски лидер кого Трамп ќе го прими откако на 20 јануари стапи на должност.
Тереза Меј во интервју за „Фајненшел тајмс“ изјави дека „верува во идните односи меѓу Лондон и Вашингтон.“
„После разговорот кој веќе го водевме, повторно сум убедена во заедничката решеност да унапредиме посебни односи меѓу нашите две земји и заеднички да работиме за просперитет и безбедност на нашите граѓани од двете страни на Атлантикот“, посочи британската премиерка.
Таа додаде дека „многу се радува“ на разговорот за унапредување на билатералните односи и другите важни прашања.
Меј денес за Би-Би-Си изјави дека со Трамп ќе разговара за слободна трговија меѓу Велика Британија и САД и значењето на НАТО, и изрази уверување дека американскиот претседател, иако неодамна рече дека Алијансата е „застарена и одмината“, ќе умее да ја препознае нејзината важност.
Уште додаде и дека администрацијата на Трамп е заинтересирана за склучување спогодба за слободна трговија со Велика Британија, и покрај политиката „Америка на прво место“ за која Трамп рече дека ќе биде негов приоритет.
Таа, меѓутоа, одби директно да одговори на прашањето дали со Трамп ќе разговара и за неговите претходни коментари на сметка на жените.
Неколку дена пред инаугурацијата, Трамп рече дека излегувањето на Велика Британија од Европската унија е „паметен потег“ и најави дека „што е можно побрзо“ ќе склучи спогодба за слободна трговија со Лондон.
Како што соопштуваат од Белата куќа, Трамп на 31 јануари во Вашингтон ќе се состане и со мексиканскиот претседател Енрике Пења Ниета, а според зборовите на Спејсер, главните теми на состанокот ќе бидат трговската размена и прашањата за миграција и безбедност.
