Косово, на барање на Соединетите Американски Држави, за дополнителни 48 часа ги одложи плановите за казнување на возачите кои одбиваат да ги предадат старите регистарски таблички издадени од Србија, потег за кој и Вашингтон и Европската унија стравуваат дека може да предизвика етничко насилство.
Спорот околу регистарските таблички речиси две години ги подгрева тензиите меѓу Србија и нејзината поранешна покраина, која прогласи независност во 2008 година и која е дом на српското малцинство на северот, поддржано од Белград.
Околу 50.000 етнички Срби кои живеат таму одбиваат да го признаат владеењето на Приштина и сè уште се сметаат за дел од Србија.
Белград рече дека никогаш нема да ја признае независноста на Косово.
Стотици полицајци, судии, обвинители и други државни службеници од српското малцинство поднесоа оставки претходно овој месец. Приштина одлучи локалните Срби конечно да ги заменат регистарските таблички издадени од општинските власти на косовските Срби, лојални на Белград, со државни косовски таблички.
Косовскиот премиер Албин Курти извести за одложувањето преку објава на својот Твитер профил денеска рано утрово.
„Го прифаќам неговото барање (на американскиот амбасадор) за одложување од 48 часа… Среќен сум што можам да работам со САД и ЕУ за да се изнајде решение во следните два дена“, напиша Курти.
Косовската полиција претходно соопшти дека казните треба да бидат изрекувани од вторник во 8.00 часот и дека ќе погодат околу 10.000 возачи.
Приштина и Белград вчера не успеаја да постигнат договор, откако беа одржани итни вонредни разговори со посредство на ЕУ, а Брисел предупреди на „ескалација на насилството“ доколку се спроведе косовскиот план.
Високиот претставник на ЕУ за надворешна политика, Жозеп Борел, кој претседаваше со разговорите, го обвини Косово за отфрлањето на предлозите на Унијата за тоа како да се реши спорот околу табличките на автомобилите.
Опозицијата во Приштина, исто така, го обвини Курти за загрозување на односите со САД, најголемиот сојузник на Косово.
Курти рече дека е повеќе заинтересиран за постигнување конечен договор со Србија во кој двете земји меѓусебно ќе се признаат како независни држави.
Српскиот претседател Александар Вучиќ вчера доцна вечерта изјави дека неговата земја ќе престане да издава и обновува регистарски таблички за северниот дел на Косово, но предупреди на зголемени тензии.
„Пред малку ги добивме најновите разузнавачки информации, состојбата е многу тешка и е на раб на конфликт’, им изјави Вучиќ на новинарите.
(Фото: ЕПА)
