Најмалку 20 лица го загубија животот кога товарен брод вчера потона во езерото Викторија, на југот на Уганда, соопшти полицијата, додавајќи дека причина за несреќата се „преоптоварувањето и лошите временски услови“.
Девет од 34-те патници, колку што, „се претпоставува“, се наоѓале на бродот, се спасени, а потрагата по евентуални преживеани продолжува, наведува полицијата во соопштението објавено попладнето на социјалната мрежа „Х“, поранешен Твитер.
Бродот кој, меѓу другото, превезувал „вреќи со јаглен, свежа храна и риба“, се превртел околу 5.00 часот по локално време.
Полицијата ги повика „жителите кои патуваат со брод секогаш да носат појас за спасување и да не го преоптоваруваат бродот“.
Бродоломите не се невообичаени во Уганда, источноафриканска земја која има многу езера, а бројот на жртви е често поголем заради тоа што патниците не носат елеци за спасување и многумина не знаат да пливаат.
Покрај тоа, бродовите често не се добро одржувани.
Во ноември 2018 година, најмалку 32 лица загинаа во Уганда кога потона брод на кој се одржувала прослава на езерото Викторија, најголемото во Африка (70.000 квадратни километри), помеѓу Танзанија, Уганда и Кенија.
Во септември истата година, повеќе од 200 луѓе ги загубија животите кога потона траект во близина на танзанскиот брег на езерото.
На Божиќ 2020 година, 26 лица се удавија кога патнички брод потона на друго угандаско езеро, Албертово, кое се протега на границата со Демократска Република Конго.
