Бројот на загинати во силните бури што предизвикаа торнада во јужните и централнозападните региони на САД се искачи викендов на 32, според локалните власти и извештаите на медиумите.
Во Мемфис, во сојузната држава Тенеси, две деца и едно возрасно лице беа пронајдени мртви во саботата, откако силните олујни ветришта соборија дрвја на неколку куќи, соопшти тамошната полиција.
Во округот Мекнери, исто така во Тенеси, официјални лица известија за уште два смртни случаи, откако претходно во саботата пријавија седум загинати, пренесуваат локалните медиуми.
Министерството за здравство на Тенеси во неделата објави дека во уште три окрузи се забележани три дополнителни смртни случаи поврзани со временските услови, но не дадоа повеќе детали.
Во округот Овен, во Индијана, според државниот Оддел за природни ресурси, маж и жена биле пронајдени во локалниот парк.
Дополнителни 15 смртни случаи од невремето, кое предизвика торнада во неколку области, претходно беа пријавени во Арканзас, Илиноис, Индијана, Мисисипи и Алабама.
Десетици луѓе се повредени, а многу згради се оштетени или уништени.
Американскиот претседател Џо Бајден вчера прогласи „голема катастрофа“ во Арканзас и нареди федерална помош за закрепнување.
Претседателот во изјавата што ја даде доцна попладнето рече дека тој и сопругата Џил Бајден се молат за луѓето погодени од невремето и побара од надлежните федерални службеници да им помогнат на оштетените и на семејствата на настраданите за нивните потреби.
„Знаеме дека семејствата ширум Америка тагуваат за загубата на најблиските, очајнички чекаат вести за оние кои се борат за своите животи и пребаруваат по рушевините на нивните домови и фирми“, рече тој.
Националниот центар за предвидување бури вчера предупреди на тешки временски услови во делови од северен и североисточен Тексас, околу Далас и Форт Ворт, вклучувајќи многу голем град, силни налети на ветер и „силно торнадо или две“.
Меѓународниот аеродром „Далас Форт Ворт“ вчера неколку часа беше затворен за слетувања, а појдовните летови беа одложени откако подрачјето беше погодено од пороен дожд, град и силни ветрови.
Слично лошо време, вклучувајќи бури со грмотевици, се предвидува подоцна оваа недела за поголемиот дел од средниот запад помеѓу Чикаго и Литл Рок, во Арканзас, соопшти центарот.
