Министерката за труд и социјална политика, Јована Тренчевска, вели дека граѓаните треба да бидат спокојни, бидејќи, како што нагласи, пари ќе има и за исплата на пензии и за плати, посочувајќи притоа дека средства за пензии, плати и надоместоци за социјална и детска заштита се предвидени во Буџетот.
„Пензионерите ги добија септемвриските пензии, зголемени за 6.8 отсто и согласно новата методологија, усогласување на пензиите ќе има два пати во годината, во септември и во март. Целта на ваквото решение е воспоставување на систем за постојан раст на пензиите. Во бројки, пензионер со просечна пензија во август 16.376 денари, во септември добил 17,490 денари, споредно со јуни 2017 година, тоа е за околу 3.500-4.000 денари повеќе, рече Тренчевска во гостувањето на Телевизија 24, каде зборуваше на неколку теми кои се во надлежност на министерството со кое таа раководи.
Новата методологија, додаде, предвидувала усогласување на пензиите и тоа, според движењето на индексот на трошоци за живот во висина од 50 отсто и порастот на просечно исплатена плата на сите вработени во државата во висина од 50 отсто, согласно официјалните податоци на Државниот завод за статистика.
Министерката информираше дека, со здруженијата на пензионери веќе било разговарано и за зголемување на минималната пензија, за што ќе се отвори социјален дијалог и ќе се креира најиздржаното решение.
Министерката Тренчевска вели дека повисока плата значи и повисока позиција и поголеми одговорности, затоа праведно е процентуалното зголемување на пензиите.
„Линеарното зголемување од 600 денари што го правеше минатата власт е непочитување на законското решение и популистичка мерка. Преку усогласувањето на пензиите согласно новата методологија, пензиите имаат постојан раст и притоа, секое усогласување влегува во основицата на пензијата“, нагласи Тренчевска.
Таа потсети дека, со јануарското усогласување на пензиите од 2.9 отсто и заедно со 6.8 отсто за месец септември, оваа година пензиите пораснале за 9.7 проценти. Како и дека 330.000 пензионери добија и финансиска поддршка од 3.000 денари за полесно справување со економска криза.
