Соединетите Американски Држави од денес воведуваат нови санкции против Русија во акцијата за одбележување на втората годишнина од руската инвазија на Украина, изјави за Ројтерс заменик-секретарот за финансии на САД, Воли Адејемо.
Адејемо наведе дека предмет на санкции на оваа акција ќе бидат 500 цели.
„Акцијата, преземена во партнерство со други земји, ќе биде насочена кон руски воено-индустриски комплекси и компании во трети земји кои на Русија и го олеснуваат пристапот до стоките што ги сака“, рече Адејемо.
Вашингтон, се наведува, се обидува да ја повика Русија на одговорност заради војната и смртта на опозицискиот лидер Алексеј Навални.
„Од утре ќе воведеме стотина санкции само овде во САД, но важно е да се запамети дека не е само Америка таа што презема акции“, рече Адејемо.
Споменатиот пакет ќе биде последен во серијата санкции против Москва кои ги најави Америка и нејзините сојузници по руската инвазија на Украина во 2022 година, во која загинаа десетици илјади луѓе и се уништени многу градови.
Новите санкции доаѓаат во време кога САД и нивните сојузници сакаат да го задржат притисокот врз Русија, и покрај сомневањата дали американскиот Конгрес ќе одобри дополнителна помош за Киев.
Администрацијата на претседателот Џо Бајден ги исцрпи парите претходно одобрени за Украина, а барањето за дополнителни средства „стои“ во Претставничкиот дом под контрола на републиканците.
„Санкциите и контролата на извозот имаат за цел да ја забават Русија, со што ќе им биде отежнато водењето војна по нивен избор во Украина“, рече Адејемо, додавајќи дека Конгресот треба да дејствува за да и ги даде на Украина потребните ресурси.
Експертите, меѓутоа, предупредуваат дека санкциите не се доволни за да се запрат нападите на Москва.
„Руската економија е пет отсто помала од она што претходно се предвидуваше“, нагласи главната економистка за санкции, Рејчел Лингаас, на веб-страницата на американското Министерство за финансии.
Сепак, руската економија има над очекувањата, при што Меѓународниот монетарен фонд во јануари прогнозираше раст на БДП од 2,6 отсто за 2024 година, што е зголемување за 1,5 процентни поени во однос на проценката од октомври.
Од друга страна, портпаролката на ММФ, Џули Козак, вчера изјави дека е јасно оти Русија сега е во воена економија, со воени трошоци кои го поттикнуваат производството на оружје, државните социјални трансфери кои ја поддржуваат потрошувачката и со растечката инфлација.
