Европската Централна Банка (ЕЦБ) е во судир со италијанската Уни Кредит банка околу нејзината политика за исплата на дивиденди и континуираното работење во Русија, пишува лондонскиот економски весник „Финансиал Тајмс“.
Централната монетарна власт во еврозоната побара банката да објави детали за најавата за исплата на 16 милијарди евра дивиденда на акционерите до 2024 година, пишува весникот, повикувајќи се на доброинформирани извори.
Најавата е во спротивност со официјалните насоки дека „банките не треба да ја одредуваат својата политика за дивиденда во апсолутни износи“, се наведува во изјавата на неименуван извор.
Како што понатаму се истакнува во текстот, односите меѓу ЕЦБ и Уни Кредит се затегнати и заради тоа што банката не ги прекинала врските со Русија.
ЕЦБ го смета присуството на италијанската банка во Русија за непожелен извор на ризик и ја повикува да го напушти рускиот пазар.
Ниту ЕЦБ ниту Уни Кредит досега не одговорија на барањето на Ројтерс да дадат свои коментари за извештајот на „Финансиал Тајмс“.
Во деловниот извештај за третиот квартал, објавен на крајот на октомври, Уни Кредит истакна дека ја намалила својата „изложеност“ во Русија за 50 отсто, на 3,1 милијарди евра.
Нејзината руска филијала во периодот од јули до септември го зголеми вкупниот приход за 76 отсто на 357 милиони евра.
Нето приходите од камати скокнале за 56,1 отсто, а приходите од надоместоци и провизии за 21,9 отсто, покажува извештајот.
Кога ќе се исклучи Русија, вкупниот приход на банката се зголемил во третиот квартал за 4,5 отсто, за 4,5 милијарди евра.
Нето приходите од камати се зголемени за 4,8 отсто и изнесуваат 2,2 милијарди евра.
(Фото: ЕПА)
