На последната листа за долгови доспеани до 31.03.2017 и неплатени до 30.06.2017 година по основ на ДДВ, данок на добивка, персонален данок на доход, придонеси од задолжително социјално осигурување, акцизи и царини се најдоа приватни производствени фирми, трговски друштва и градежни компании, угостителски објекти но и претпријатија во државна сопственост и физички лица…
Најгоре, со долг од над 11 милиони евра е Отекс АД од Охрид. Зад него е јавното претпријатие „Македонија пат“ чиј долг надмина седум милиони евра. Третиот најголем должник на УЈП е компанијата Ел Дон Кастиљо ДОООЕЛ Експорт-Импорт од Скопје која на државата и должи 428.934.651 денари.
Во првите десет најголеми должници се и „Ел Азтека“, „Мотор Коач“, „Естетика 2002“, „Глобал Италу“, „Италмонд“, „Уни М“ и гостиварското комунално претпријатие.
Од листата на УЈП не изостануваат ниту МРТ која стаса до долг од 91.832.757 денари, „Хедис“ ДОО Скопје, Чистота и Зеленило од Куманово и тетовското јавно комунално претпријатие.
Меѓу најголемите должници се и некои компании од чуствителната индустрија за обезбедување на имот и лица. Фирмата „Никоб“ експорт импорт од Скопје има неплатен долг во износ од 42.157.407 денари.
„Зачудува фактот дека изминатите години во Македонија била толерирана неажурноста на даночните обврзници, посебно на големите фирми и јавните претпријатија, во неплаќање на данокот и отсуството на флексибилност, односно разбирање во законски рамки за обврзници кои имаат потешкотии. Кај малите фирми често се реагирало премногу остро“, велат за „Актуелно“ извори од УЈП.
Според информации од Управата нема повеќе привилегии за даночните должници. Даночната управа го ограничила управувањето со парите на должниите и издала инструкции на сите регионални управи да продолжат со наплатата на долгувањата. Се споменува и, наводно, за банкарска блокада на фирмите за исплата на долгот.
