Управата за финансиска полиција има сознанија дека е извршена злоупотреба на службената положба од страна на одговорни лица во Агенцијата за филм како пречекорување во однос на исплатата на средства, неможност за следење на средствата и ненаменско користење на средствата од страна на продукциска куќа која е ангажирана за правење игран серијал за проектот „Македонија“.
Упадот на финансиската полиција во Агенцијата за филм денеска во изјава за „Макфакс“ го потврди директорот на Управата за финансиска полиција, Арафат Муареми.
Во моментот оваа надлежна институција, која веќе подолго време на увид ја има документацијата и собира информации со кои може да се утврдат индициите за финансиски нерегуларности, не сака никого да посочи со прст бидејќи, како што изјавуваат од таму, „предметот е сѐ уште во предистражна постапка и подетални информации би ѝ наштетиле на истрагата, но веднаш по нејзиното завршување и без оглед на нејзиниот исход, јавноста ќе биде навреме информирана“.
Станува збор за играна серија со наслов „Македонија“, во која било предвидено во четири сезони и со нешто повеќе од 4 милиони евра амбициозно да се филмува македонската историја.
Главен продуцент на серијата е Винко Грубишиќ од хрватската продуцентска куќа „Јадран филм“.
За досега најскапата серија што требаше да биде снимена кај нас имаше двегодишно вето за информации, а нема ниту еден готов производ, ниту една снимена епизода. Официјално, хрватската продукцијата „Јадран филм“ и нејзиниот сопственик Винко Грубишиќ досега добиле 80 отсто од средствата за првата сезона и овие пари се одлеале во подготовките и претпродукцијата.
