Во насока на заложбите за јакнење на демократските политички вредности, промоција и заштита на човековите права и слободи, политичкиот плурализам, меѓусебната
толеранција, заедништво и солидарност, со одлука на претседателот Стево Пендаровски се формираше Претседателски центар за политичко образование.
Како што соопштија од кабинетот на претседателот, Центарот за политичко образование е еден од клучните проекти во неговата програма за работа, кој ќе ги поврзе младите од различно потекло во рамки на повеќе едукативни настани со еминентни предавачи и обучувачи од земјата и странство.
„Целта е да го поттикнеме интересот кај младите за политиката и да се мотивираат да се вклучат, подобро да ја разберат и да ја практикуваат политиката на најдобар можен начин. Преку Центарот ќе ја промовираме културата на дијалог во духот на демократските вредности и ќе придонесеме за сеопфатно вклучување на политичкото
образование во формалното и неформалното образование“, истакна претседателот Пендаровски.
Со цел спроведување на активностите на Претседателскиот центар за политичко образование, како повремено работно тело на претседателот на Република Северна Македонија, е формиран Програмски совет составен од претседател, седум членови и секретар.
Како партнери во рамките на овој проект учествуваат фондациите и здруженијата : Фондација „Фридрих Еберт” – Скопје; Фондација за демократија на Вестминстер, подружница во Република Северна Македонија; Фондација „Конрад Аденауер”, подружница – Скопје, Национален демократски институт за меѓународни работи (НДИ), канцеларија во Северна Македонија, Меѓународен републикански институт (ИРИ), подружница – Скопје и Фондација „МК2025”.
„Во работата и активностите на Претседателскиот центар за политичко образование можат да учествуваат сите здруженија и фондации од земјата и странство кои имаат основна цел да ја промовираат културата на дијалог во духот на демократските вредности“, стои во соопштението од кабинетот на претседателот Пендаровски.
