Хелсиншкиот комитет идентификуваше можни 28 кривични дела сторени за време на насилството во Собранието на 27 април, кое се случи непосредно по изборот на претседател на Собранието на Македонија.
„Овој посебен извештај се однесува на кривични дела идентификувани преку фотографии, аудио и видео материјали и сведоштва, како и на кривични дела за кои постојат сомненија, но сè уште не е истражено дали биле сторени и од кого. Во него се осврнуваме на повредите на правата и слободите гарантирани со Уставот и санкционирани со Кривичниот законик“, велат од Комитетот.
Извештајот е наменет за информирање на јавноста, но и како алатка која на правосудните органи може да им послужи при носењето на одлуки поврзани со квалификацијата на кривичните дела и индивидуализација на кривичната одговорност при изрекувањето на казни од страна на суд.
„Сторени се вкупно 28 кривични дела, од кои за 18 веќе постојат значителен број на докази и 10 кривични дела за кои постои сомнение дека се извршени“, соопштуваат од „Хелскиншки“.
Патем, додаваат дека улогата на правосудните органи е да утврдат дали и кои од посочените кривични дела се сторени или имало обид за нивно сторување и, како што велат, да не дозволат погрешна квалификација, колективизирање на одговорноста и паушално санкционирање.
Можните сторители во извештајот се поделени во четири групи: организатори, извршители, полициски службеници и нивни претпоставени
Кривичните дела произлегуваат од осум поглавја од Кривичниот законик, а се насочени против животот и телото, слободите и правата на граѓаните, имотот, сигурноста, државата, службената должност, правосудството и јавниот ред.
Од Хелсиншки комитет потсетуваат дека на 27 април 2017 година, околу 19 часот, организаторите и учесниците во протестот „За заедничка Македонија“ насилно влегле во собраниската зграда.
„Видено од многубројните видео снимки, полициските службеници задолжени за чување на јавниот ред и мир и безбедноста на присутните во собраниските сали, дозволија непречен влез на протестантите. Влезот им беше дозволен и на лица кои беа маскирани со качулки и кои со себе носеа тврди и остри предмети наменети за загрозување на физичкиот интегритет на присутните во Собранието. Набрзо потоа повредени беа десетина пратеници, од нив најмалку еден со тешки повреди, новинари, над 70 граѓани и над 20 полициски службеници. МВР во координација со Основното јавно обвинителство идентификуваше дваесетина сторители на кривични дела. Дел од нив беа приведени. За некои од нив е определен притвор, куќен притвор и други мерки на претпазливост. Засега, идентификуваните сторители се осомничени дека сториле три вида на кривични дела – учество во толпа што ќе спречи службено лице во вршење на службено дејствие, учество во толпа што ќе изврши кривично дело и предизвикување општа опасност“, потсетуваат од Комитетот.
