Херсон е првиот голем град што Русите го освоија на почетокот на војната. Падна практично без да биде испукан ниту еден куршум, а во Киев долго време после тоа се водеше расправа како е можно толку стратешки важен град од 240.000 жители да му се остави на непријателот без вистински отпор.
Како и да е, Херсон во овие осум месеци помина низ се и сешто.
На почетокот на окупацијата, Украинците во Херсон им пркосеа на Русите излегувајќи на протести, јавно ги навредуваа, а Русите тоа со денови молчејќи го толерираа. Меѓутоа, многу брзо нивното трпение попушти и почнаа да пукаат во луѓето. После тоа имаше некаков мир, ако може така да се нарече. Повеќе од стравопочит.
Русите го контролираа секој чекор на жителите на Херсон, за време на квази-референдумот буквално вооружени војници им влегуваа на луѓето во нивните домови. Во Херсон имало, се претпоставува, околу 20.000 руски војници кои од ден на ден се чувствувале се поизолирани. Опремата и резервите од храна се потешко и потешко стигнувале до градот, а сè тргнало надолу по експлозијата на мостот на Крим. Тогаш главниот пат за снабдување на Херсон беше дефинитивно прекинат.
И граѓаните кои му останаа лојални на Киев на почетокот на октомври почувствуваа дека нешто се случува.
„Слободата се чувствува во воздухот“, му напишал еден Украинец на новинар на Би-Би-Си.
Меѓутоа, се чувствувала и непријатност. Сите се прашувале што се подготвени Русите да сторат пред да го напуштат градот? Последниве денови од Херсон стигнуваат вести за масовни грабежи на продавници, станови, па дури и музеи.
Денес Херсон изгледа како град на духови. Град кој очекува низ него да помине силен ураган.
„Знаете што? Во овие осум-девет месеци ги поминавме сите фази на страв, па не ни е баш гајле. Нека дојде цунами!“
Во последните две-три недели состојбата во градот драстично се промени. И Русите веројатно станаа свесни дека наскоро ќе мора да ја преминат реката Днепар и ќе престанат да се занимаваат со Украинците.
„Одеднаш луѓето на улица почнаа да зборуваат украински. Претходно се плашеа. Дури и руската рубља полека исчезна. Влегов во млекарницата и го прашав продавачот дали примаат рубљи. Тој се насмеа и ми рече: ‘Рубли!? Тоа, од другата страна на реката…’“
Во меѓувреме стегата потполно попушти, па дури во Херсон почнаа да се гледаат и програми на украинската телевизија.
Сега, кога е сосема јасно дека окупаторите го напуштаат градот, почнаа да кружат секакви гласини.
Најновото е дека Русите планираат да ја кренат во воздух браната „Нова Каховка“ и да ја поплават целата област. Исто така, се зборува и дека руски војници во цивилна облека се кријат по станови и го чекаат непријателот, а најчестата гласина е онаа дека Русите, од левата страна на Днепар, едноставно ќе го срамнат целиот град со земја.
Како и да е, сите што остануваат во градот чувствуваат дека пристигнал критичниот момент. Русите си заминуваат, а никој не знае што ќе биде понатаму…
(Фото: Профимедиа)
