Хрватска и Финска, како и Холандија и Канада, добија пилот проекти за развој на дигитален пасош на мобилен телефон, чија крајна цел е да се олесни патувањето и да се подобри безбедноста на патниците.
Хрватските граѓани, така, ќе бидат меѓу првите во Европската унија кои ќе можат да користат дигитална патна исправа во својот дигитален паричник на мобилниот телефон.
Дигиталниот документ ќе им овозможи на граѓаните, на пример, однапред да го најават своето пристигнување во некоја земја, и така максимално да го скратат времето на минување на граничните премини.
Проектот во Хрватска го спроведуваат Министерството за внатрешни работи и АКД, од каде појаснуваат дека се работи за проект кој бара многу, проект на кој му претстои развој и бројни тестирања, што е и причина што Европската комисија одобри финансирање во износ од речиси 2,3 милиони евра, пишува „Јутарњи лист“.
Хрватските граѓани уште од 2009 година користат еПасошот, чија безбедност во моментов се заснова на проверка на автентичноста на личните податоци кои се наоѓаат во физичка и во електронска форма.
Тоа значи дека дигитализираните податоци зачувани во чипот на пасошот се идентични со печатените податоци во пасошот.
Исклучок се биометриските податоци.
Како што објаснуваат во АКД, пилот-проектите што ќе ги спроведуваат Хрватска и Финска, како и Холандија и Канада, имаат за цел да имплементираат дигитален документ за патување, чија виртуелна компонента е поврзана со еПасошот, односно содржи делумна копија од биографските и биометриските податоци на лицето кои се наоѓаат во еПасошот.
Тоа ќе овозможи идентификација на патниците само врз основа на виртуелната компонента на дигиталниот патен документ.
За новиот дигитален пасош во АКД ќе го продолжат развојот на мобилната апликација „Сертилиа“ (Certilia), која секој граѓанин кој има валидна лична карта со чип може да ја користи за дигитална потврда на идентитетот.
„За потребите на пилот-проектот, АКД ќе му овозможи на носителот на пасошот да креира дигитален акредитив за патување во рамките на мобилната апликација ‘Сертилиа’, кое е средство за електронска идентификација од највисоко ниво. Бидејќи ‘Сертилиа’ ги има сите предуслови за иден дигитален паричник на ЕУ, логично е дека АКД на нашите граѓани ќе им обезбеди и дигитален пасош на мобилен уред“, истакнува Јуре Сертиќ, директор на АКД.
