Како одминува Светското фудбалско првенство, така клопчето полека се одмотува. После осмиот ден на Мундијалот, после Русија и Уругвај, и Харватска обезбеди учество во осминафинале.
„Коцкестите“ вечерва ги совладаа „гаучосите“ со 3:0.
Аргентинците, во зависност од останатите натпревари во групата, би можеле да ги спакуваат куферите.
Првото полувреме заврши без голови 0:0.
„Гаучосите“ за 45 минути не успеаја ниту еднаш да шутнат во рамките на голот, а Лионел Меси беше речиси незабележителен на теренот.
Од друга страна, Хрватите својата шанса за гол во неколку наврати ја побараа преку Манџукиќ.
Второто полувреме почна со истите стартни постави.
По само осум минути игра во вториот дел, после голема грешка на асргентинскиот голман Кабаљеро, Хрватска поведе со 1:0.
Во 53 минута од натпреварот Меркадо ја врати топката на својот голман, а тој пак сакаше да му ја врати назад, но таа наместо кај Меркадо дојде до Ребиќ. Топката му легна на нога на хрватскиот фудбалер кој со волеј удар и донесе водство на својата екипа.
Сампаоли, селекторот на аргентинската репрезентација, реагираше веднаш после примениот гол. Тој во игра ги внесе Игуаин и Павон на местото на Агуеро и Салвио.
Аргентина напаѓаше, но без сериозни прилики за гол.
Во 80 минута Хрватска го зголеми водството, после сјајниот погодок на Лука Модриќ. Аргентинците му оставија премногу простор на капитенот на противничката екипа, којшто од околу 20 метри силно шутираше меѓу двајца дефанзивци на Аргентина, а топката заврши во долниот лев агол на Кабањеро.
Аргентинците ја направија и последната измена на овој натпревар. На терен влезе Дибала, но позначајни промени во играта на „гаучосите“ немаше.
Грешката што ја направија кога Модриќ дојде до погодокот Аргентинците ја повторија 12 минути подоцна. Премногу простор им оставија на Хрватите, а тоа го искористи Ракитиќ, којшто се запиша во листата на стрелците во 92 минута и го постави конечниот резултат, Хрватска-Аргентина 3:0.
