Еквадор, кој се соочува со бран насилства без преседан поврзани со трговијата со дрога, годинава меѓу јануари и април заплени повеќе од 64 тони наркотици, соопшти вчера еквадорската полиција.
„Во април, 995 лица беа уапсени за случаи со дрога и запленивме 18,5 тони“, им изјави за новинарите полицискиот генерал Пабло Рамирез, национален директор за борба против дрогата.
„Оваа година запленети се 64,6 тони дрога, а 4.099 лица се уапсени за шверц на наркотици“, рече Рамирез.
Надлежните органи во заплените ги вклучуваат сите видови дрога, а најмногу кокаин.
Последната заплена од 1,9 тони кокаин беше скриена во пратка со банани која требало да тргне од пристаништето Гвајакил за Шведска.
Според властите, во 2022 година биле запленети повеќе од 200 тони, а во 2021 година дури 210 тони, што е рекорд.
На брегот на Тихиот Океан, Гвајакил е еден од градовите кои се најтешко погодени од трговија со дрога и насилство. Најмалку 18 луѓе беа убиени таму викендов, известија локалните медиуми.
Во саботата, неидентификувани напаѓачи отворија оган врз луѓето кои гледале фудбалски натпревар на телевизија, при што убиле десет лица.
Пред 20 дена во провинцијата Есмералдас, на северозападот на земјата, триесетина вооружени мажи отворија оган врз тамошни жители и убија девет лица.
Според властите, жртвите биле под заштита на криминална група и, наводно, ги нападнала ривалска група.
Во затворите во земјата судирите меѓу затвореници однесоа повеќе од 420 животи од 2021 година, додека надвор од затворите стапката на убиства речиси двојно се зголеми меѓу 2021 и 2022 година, од 14 на 25 убиства на 100.000 жители.
Оваа експлозија на насилство ја поттикна владата да воведе вонредна состојба во најзагрозените провинции и градови, во крајбрежните области Санта Елена, Лос Риос и Есмералдас, како и во градовите Гвајакил, Дуран и Самборондон.
Претседателот Гиљермо Ласо ги прогласи криминалните групи за „терористички“, дозволувајќи им на вооружените сили да патролираат по улиците заедно со полицијата.
(Фото: АФП)
