Цените на нафтата утрово повторно пораснаа, поттикнати од растечките тензии меѓу САД и Иран, како и од стравувањата за нарушување на глобалното снабдување со енергенси.
Цената на суровата нафта од типот Brent Crude се зголеми за околу 1,5 проценти и достигна 110 долари за барел, додека американската West Texas Intermediate (WTI) порасна за 1,8 проценти, на околу 107 долари за барел.
Растот на цените следува по предупредувањето на американскиот претседател Доналд Трамп дека на Техеран му „истекува времето“ за постигнување договор со Вашингтон.
Иранските медиуми, пак, објавија дека преговорите остануваат во ќор-сокак и дека американската страна не понудила „конкретни отстапки“.
Дополнителна загриженост на пазарите предизвикаа нападите врз енергетската инфраструктура во Персискиот Залив, меѓу кои и напад врз нуклеарен објект во Обединетите Арапски Емирати, како и нови напади со дронови насочени кон ОАЕ и Саудиска Арабија.
Во меѓувреме, администрацијата на Трамп повторно воведе санкции за руската нафта, што дополнително ги зголеми стравувањата за ограничени глобални залихи.
Во фокусот на светските пазари останува и Ормутскиот теснец, низ кој поминува речиси една петтина од светските испораки на нафта и течен природен гас. Теснецот е клучна рута за извоз на енергенси од земји како Саудиска Арабија, Ирак и Катар.
Иранскиот министер за надворешни работи Абас Арагчи изјави дека Техеран нема доверба во САД, но додаде дека Иран и понатаму е подготвен и за дипломатски разговори и за можен обновен конфликт.
