Некои од големите тренерски ѕвезди мораа да бидат губитници во сезоната во Англија, затоа што место во Лигата на шампиони немаше за сите. Последното коло, во кое немаше изненадувања, потврди дека тоа е Арсен Венгер, менаџерот на Арсенал, кому триумфот над Евертон не му значеше ништо – 3:1 (Бељерин 8, Санчез 27, Рамзи 90+1 – Лукаку 58, пенал). „Топчиите“ завршија на пето место кое води во Лига Европа.
Францускиот тренер после 19 години во низа не ја внесе својата екипа во најелитното натпреварување на УЕФА.
А, во Лигата на шампиони се враќа Ливерпул, кој во финишот на првиот дел го скрши отпорот на Мидлсборо, и на крајот славеше со убедливи 3:0. Триумф за второ место во Премиер лига.
Третата позиција Манчестер сити ја сочува со „петарда“ на гостувањето кај Вотфорд. Головите за „граѓаните“ ги постигнаа Компани во 5 минута, Агуеро во 23-та и 26-та, Фернандињо 41-ва и Габриел Жесус во 58 минута.
И додека Арсенал, Ливерпул и Манчестер сити за своите цели се бореа до самиот крај на првенството, Челси последните 90 минути ги искористи на најдобар можен начин да го прослави освојувањето на шестиот пехар во историјата на клубот. Жртва на разиграните „сини“ беше последнопласираниот Сандерленд.
Стрелци за Челси беа Вилијан во 8, Азар во 61, Педро 77 и Батшуаи во 90 и 90+2, а Манкињо во 3-та минута за Сандерленд.
Овации за Тери
Стадионот „Стамфорд бриџ“ во 26 минута беше преплавен со емоции, затоа што тогаш легендарниот капитен Џон Тери излезе од игра, со што се прости од Челси после 22 години. Соиграчите му направија почесен шпалир низ кој, со овации, го напушти теренот.
Тотенхем со „седмица“ го овери освојувањето на второто место. Само три дена откако на Лестер му ја наполни мрежата (6:1), денеска на гостувањето кај Хал покажа уште поголема ефикасност. Кејн во 11,13 и 72, Али 45+2, Ванијама 69, Дејвис 84 и Алдервирелд 87 беа стрелци за Тотенхем, а Клукас во 66 минута за Хал.
Манчестер јунајтед практично со резервен состав беше подобар од Кристал Палас и победи со 2:0, со головите на Хароп во 15 и Погба во 19 минута.
