Универзитетскиот професор по уставно право, Светомир Шкариќ, оценува дека предлогот на Комисијата за заразни болести во домовите да не може да се собираат повеќе од четворица гости е оправдан. Во услови на пандемија, вели тој, примарно е јавното здравје, а на Уставот треба да се размислува откако државата ќе успее да се справи со кризата која е и глобална.
„Што е Уставот во однос на пандемија? Во Лондон не смеат повеќе од шестмина на улица да се движат. Ни правото ни Уставот не можат во вакви вонредни услови да имаат никакво значење. Моне вели дка нужноста ја создава Европа, а не нечија желба. И, сега, кај нас има нужност. Правото сега треба да молчи. Ние имаме нова околност, загрозување на целата нација. Ако една Америка не може да излезе на крај, што останува за малите народи, ќе исчезнеме како ништо ако не постојат светските усилби да се дојде до вакцината. Ситно е да го толкуваме Уставот сега во вакви услови. Треба да се обединиме и многу проблеми да решаваме без правни средства. Да се види како да се спасиме и да ги почитуваме мерките“, изјави професорот за ,,Слободен печат”.
Тој додава дека конкретната мерка со која во домовите се предлага освен оние што живеат на истата адреса да не смеат да присуствуваат повеќе од четворица, не се однесува на неповредливоста на домот, туку на ограничување на правото на слобода на движење.
„Се е тоа ограничување на слободата на движење и во домот дури. Најчувствителни на такви ограничувања беа Британците, а сега мора да го трпат тоа. Ни во паб не можат да одат. Во прашање е повисокото добро, животот, и тоа не само на еден човек, туку опасноста што нечие однесување може да биде за другите животи“, смета професорот Шкариќ.
Комисијата за заразни болести вчера и предложи на владата да препорача нови мерки откако епидемиолошката слика во земјава со коронавирусот се влоши, болничките капацитети се наполнија, а за три дена беа регистрирани 1000 нови случаи на Ковид 19.