Членките на коалициската влада на германската канцеларка Ангела Меркел постигнаа договор, актуелниот шеф на дипломатијата, социјалдемократот Франк-Валтер Штајнмаер да биде нивниот кандидат за иден претседател на Германија.
Вицеканцеларот Зигман Габриел, шефот на Социјалдемократската партија, им потврди на новинарите дека е постигнат политички договор.
Со тој договор практично е загарантиран изборот на Штајнмаер на функцијата претседател.
Шеесетгодишниот Штајнмаер, според анкетите, е најпопуларна личност во Германија.
„Во ова време на криза во светот тој направи се што е можно за нашата земја и за Европа и ги промовираше мирот и безбедноста“, рече Габриел во обраќањето пред новинарите во Берлин и додаде дека многумина поради тоа сакаат Штајнмаер да биде идниот претседател.
СДП е партнер во владеачката коалиција, заедно со Христијанско демократската унија (ЦДУ) на Ангела Меркел и нејзината баварска сестринска партија Христијанско социјалната унија (ЦСУ).
Претседателот на ЦСУ, Хорст Зехофер, на собирот рече дека ЦДУ и ЦСУ се сложиле Штајнмаер да биде нивни заеднички кандидат.
„Ние се договоривме. Тоа е многу важно“, истакна Зехофер.
Според политичката традиција во Германија, коалициските партии ЦДУ и ЦСУ и социјалдемократите СДП треба да се сложат околу заедничка личност за таа главно церемонијална функција, која треба да биде над партиските поделби.
