Првото нешто што ќе го забележите кај редизајнираниот Јутјуб е суптилниот ефект на амбиентално осветлување, ако имате поставено темна тема, што ја прилагодува бојата на заднината на апликацијата на она што го гледате. Оваа функција се појавува на веб и на мобилните уреди за сите што користат темна тема. Освен при гледањето видеа, ќе имате и амбиентален ефект на плеј-листите.
Исто така, што се однесува до темната тема, таа ќе стане уште потемна за боите да бидат уште повпечатливи на екранот. Ова ќе биде достапно на веб, мобилните уреди и на паметни телевизори, се вели во соопштението.
Покрај амбиенталното осветлување, страницата за гледање видеа доби и други подобрувања со фокус на видео плеерот. Врските на Јутјуб во описите на видеата се менуваат во копчиња, а вообичаените дејства како „лајкување“, споделување и преземање се малку посуптилни.
Што се однесува до практичните иновации, најголемата промена се однесува на можноста за зумирање со прстите и прецизно пребарување на точно одреден дел од видеозаписот.
Зумирањето функционира на ист начин како и кај фотографиите, на кои веројатно веќе сте навикнати. Зумираното видео останува зголемено за да можете да уживате во него. Од друга страна, прецизното пребарување ќе ви помогне побрзо да ги најдете деловите кои најмногу ве интересираат. Без разлика дали сте на десктоп или мобилен, едноставно повлечете или поминете со прстот нагоре за да откриете серија сликички во видео плеерот за да стигнете до точно одредениот дел во секој видеозапис.
