Капитенот на лондонски Арсенал, Гранит Џака се огласи прв пат по минатонеделниот инцидент кога ги провоцираше навивачите, ја фрли капитенската лента, го соблече дресот и отиде во соблекувалната откако беше заменет на средбата со Кристал Палас (2:2).
Навивачите беа изнервирани од неговото бавно излегување од теренот во моментот кога Арсенал бркаше победа, а откако го направи споменатото, доби мноштво свирежи. Освен тоа, навивачите жестоко го искритикуваа и на социјалните мрежи на кои, вели, добивал и смртни закани.
Неговото службено соопштение го објави Арсенал на социјалните мрежи.
„Откако си зедов малку време за да можам со ладна глава да согледам се што се случи минатата недела, одлучив да ви појаснам за што станува збор подобро отколку да објавам некаков кус одговор. Она што се случи во текот на мојата замена силно ме погоди. Секогаш го сакав овој клуб и за него давав 100 отсто на теренеот, а и надвор од него. Страшно ме погодија навредите на социјалните мрежи и чувството дека луѓето не разбираат низ што поминувам. Ми зборуваа дека ќе ми ги искршат нозете и ќе ми ја убијат жената и ми посакуваа ќерката да ми добие рак. Тоа страшно ме разлути, а точката на вжештување се случи после реакцијата на публиката додека излегував од теренот. Целата ситуација ме понесе и со својата реакција го повредив оној дел од навивачите кој е секогаш со клубот и екипата и кој мене и соиграчите не полнат со позитивна енергија. Тоа не ми беше намерата и заради тоа длабоко им се извинувам. Се надевам дека сите заедно повторно ќе почнеме да се почитуваме едни со други. Се надевам дека ќе тргнеме напред во позитивна атмосфера.
Гранит“
Новинарите го прашаа тренерот на Арсенал, Унаи Емери, каква е ситуацијата со Џака, на што Шпанецот рече дека не сака да одговори на тоа прашање. Новинарите тоа го протолкуваа како јасен знак дека Швајцарецот излегува од екипата, па не се очекува дека Џака ќе игра во сабота дома против Волверхамптон.
