„Судството во Република Македонија сеуште работи и суди по двојни аршини. Од една страна, со умисла се кочат и опструираат предметите кои што ги работи Специјалното јавно обвинителство, штитејќи осмничени криминалци за тешки кривични дела против државата или милионски финансиски злоупотреби.

Од друга страна, кога станува збор за обични граѓани, судот се однесува најсурово и надвор од границите на разумот, надвор од сите примери на судска пракса во Македонија, регионот, ЕУ, па и пошироко…

Денес, во кривичниот Суд Скопје 1 беше објавена пресуда за кривично дело трговија со дрога, а се судеше за 2,8 килограми марихуана.

За 2,8 килограми марихуана, им се судеше на 9 граѓани, а вкупната затворска казна која што беше изречена изнесува 45 години. Највисоката казна е 13 години затвор, другите казни се 9, 8, 6, и 4 години, а најниските казни се по 1,5 години затвор.

За апсурдот да биде најголем, за тој кривично правен настан веќе постои правосилна пресуда!

Очигледно, насушно потребните реформи во судството треба да се започнат со основните постулати во кривичното законодавство, а тоа е правилото на res judicata – односно забрана да се суди за веќе пресудена работа“, се наведува во соопштението што Комитетот за заштита на правата денес го лиферуваше до јавноста.