Роберт Ф. Кенеди Помладиот, адвокат и скептик кон вакцините, ќе се кандидира за Белата куќа во 2024 година, со што стана вториот демократски кандидат кој ќе го предизвика претседателот Џо Бајден во неговата очекувана трка за уште еден мандат.
Шеесет и деветгодишниот Кенеди, син на убиениот претседателски кандидат, американскиот сенатор Роберт Ф. Кенеди во 1968 година, ја поднесе својата кандидатура до Сојузната изборна комисија во средата.
Долгогодишен противник кон вакцините, во 2017 година беше избран да ја надгледува работата на претседателскиот панел за ревизија на сигурноста и науката за вакцините, на барање на тогашниот американски претседател Доналд Трамп, што веднаш предизвика критики од научниците и здравствените експерти кои стравуваа дека до тоа ќе им се даде легитимитет на скептиците кон вакцинацијата на децата.
Во 2021 година, Инстаграм го отстрани профилот на Кенеди откако тој повеќе пати сподели разоткриени тврдења за ковид-19, со што ја прекрши политиката на платформата за пандемијата со Корона вирус.
Адвокатот за заштита на животната средина и член на познатата американска политичка династија, е внук на убиениот претседател Џон Ф. Кенеди.
Тој своите претседателски амбиции ги најави уште во март на Твитер кога побара совет дали да се кандидира или не за Белата куќа.
„Ако се чини дека можам да соберам пари и да мобилизирам доволно луѓе за да победам, ќе скокнам во трката“, напиша тој.
„Ако се кандидирам за функцијата, мојот главен приоритет ќе биде да се запре корумпираната врска помеѓу државата и корпоративната моќ која ја уништи нашата економија, ја уништи средната класа, ги загади нашите пејзажи и води, ги отру нашите деца и ни ги одзеде нашите вредности и слободи“, додаде тој.
Маријана Вилијамсон, духовна советничка која предупреди на „темната психичка сила“ што ја ослободил поранешниот републикански претседател Доналд Трамп, во март стана првата демократка која најави дека ќе се кандидира на претседателските избори во 2024 година. Таа повика на „правда и љубов“.
(Фото: Сипа УСА / Алекс Милан Трејси)
