Швајцарскиот производител на часовници „Омега“ изјави дека е жртва на организиран криминал, пренесува Си-Ен-Ен.
„Омега“ тврди дека тројца нејзини поранешни вработени признале дека лажен рачен часовник „Омега Спидмастер“ (Omega Speedmaster) се обиделе да продадат за 3,115 милиони швајцарски франци (3,185 милиони евра).
Самата компанија на аукција во Женева која се одржала во ноември 2021 година, го купила лажниот часовник по цена што била 25 пати повисока од проценката на организаторот на аукцијата.
Од „Омега“ изјавија за Си-Ен-Ен дека планирале да го изложат часовникот во својот музеј во Биен, Швајцарија. Се сметало дека е примерок од 1957 година, за кого аукциската куќа „Филипс“ тврдела дека станува збор за часовник од нерѓосувачки челик.
Наводно, се работело за еден од првите и најценетите модели од линијата „Спидмастер“.
Подоцна, меѓутоа, било утврдено дека часовникот, кој бил купен со помош на посредник, всушност е „чудовиште на Франкенштајн“ – неавтентичен примерок составен од главно автентични делови на „Омега“.
„Тој часовник сега е клучен доказ во истрагата за таа сомнителна трансакција. Неговото фалсификувано наследство им овозможи на профитерите да му ја зголемат цената“, рече Џовани Алегре, висок управител за комуникации во „Омега“.
Од „Омега“ соопштија дека одговорноста за измамата ја презеле тројца поранешни вработени во компанијата и дека ќе бидат тужени.
Аукциската куќа „Филипс“, пак, истакна дека на истражителите и на полицијата ќе им даде информации за продавачот, доколку тоа од нив биде побарано. „Омега Спајдермастер“ е познат по тоа што во 1969 година стана првиот часовник што беше носен на Месечината. Го носеше астронаутот Баз Олдрин.
Актерите Рајан Рејнолдс и Џорџ Клуни и професионалниот играч на голф, Рори Меклирој, се видени со часовници „Спидмастер“ на нивните раце.
