Судскиот совет денеска на седница едногласно, со 11 гласа „за“, избра 25 кандидати од распишаните огласи за места во Основните судови во Битола, Свети Николе, Тетово, Струмица и двата во Скопје – Кривичниот и Граѓанскиот.
Дваесет и петте нови судии се од последната генерација на Академијата за судии и јавни обвинители чие школување заврши во февруари годинава.
Меѓу денеска избраните нови судии се и имињата на блиски роднини на функционери, обвинители и судии.
За во Основен граѓански суд во Скопје избрани се Кристијан Митревски, Симона Бубевска-Муцунски, Лилјана Костојчиновска, Драган Петрушевски, Маја Каталиниќ, Андреа Апостолоска-Малиновска, Пајтим Машкули, и Јордан Јованов, а пак за во „Кривичен“ Марија Беговиќ, Биљана Смаќоска, Драгана Исаковска, Драган Јосифоски, Ахмед Идризи, Фросина Стојановска, и Кирил Георгиев.
По тројца новопримени има за во битолскиот и струмичкиот суд, Петар Чаловски, Елена Журовска и Горан Димовски односно Катерина Тодорова, Билјана Иванова и Костадин Ѓорѓиев, двајца нови судии се примени во судот во Тетово, Бојана Тоиќ и Реџеп Муса, а еден во Основниот суд во Свети Николе – Драгана Илиоска.
Од последната, седмата генерација на Академијата за судии и јавни обвинители со уверенија се здобија вкупно 58 слушатели – 30 за судии и 28 за јавни обвинители.
Повеќето од обвинителите веќе се избрани, а меѓу имињата што го привлекоа вниманието на јавноста беа Барлет Џафери (син на собранискиот спикер Талат Џафери) и Албулена Абази (сопруга на шефот на Основното јавно обвинителство за гонење организиран криминал и корупција, Ислам Абази).
Џафери беше избран за обвинител во Гостивар, а Абази во Кичево.
(Фото: Сакамдакажам.мк)
