Американскиот претседател Доналд Трамп денеска го бранеше специјалниот пратеник Стив Виткоф, откако беше објавено дека во прислушуван телефонски разговор давал насоки на висок руски функционер, пренесе „Њујорк тајмс“.
Трамп изјави дека Виткоф применувал „стандардни преговарачки техники“ во рамките на најновата американска иницијатива за прекин на војната во Украина и дека повторно ќе го испрати во Русија на средба со претседателот Владимир Путин.
Агенцијата „Блумберг“ претходно објави дел од наводен стенограм од разговор од 14 октомври меѓу Виткоф и Јуриј Ушаков, советник за надворешна политика на Путин. Во разговорот, Виткоф наводно давал совети како Москва да ја обезбеди поддршката на Трамп за прифатливи услови за прекин на конфликтот.
Трамп, говорејќи пред новинарите во авионот „Ер Форс Еден“, оцени дека разговорот бил дел од дипломатските напори.
– Не сум слушнал за тоа, но тоа е сосема нормално. Тоа е работата на еден преговарач, истакна американскиот претседател.
Тој додаде дека преговорите покажуваат „добар напредок“, но дека постигнувањето договор е потешко од очекуваното. Според него, личните односи со Путин би можеле да помогнат во процесот, кој го оцени како „сложен“.
Белата куќа соопшти дека мировниот план бил изготвен од Џаред Кушнер и Виткоф, кои претходно неколкупати се состанувале со руски официјални претставници.
Локални меидуми посочуваат дека дел од републиканските законодавци го критикуваат Виткоф. Конгресменот Дон Бејкон на платформата „Икс“ напиша дека Виткоф „целосно застанал на страната на Русија“ и дека не може да се смета за доверлив преговарач.
