Акциите на глобалните берзи ја почнаа неделата со мешовити разлики, затоа што инвеститорите и понатаму се под влијание на минатонеделниот американски удар на Сирија, додека резултатот од претседателската трка во Франција е се понеизвесен.
Во попладневните часови, лондонскиот индекс на акции ФТСЕ 100 падна за помалку од 0,1 отсто, на 7.346,32 поени, франкфуртскиот ДАКС 30 за 0,3 отсто, на 12.191,54 поени, а парискиот КАК 40 за 0,5 отсто, на 5.109,52 поени, пренесува агенцијата Франс прес.
„Акциите на глобалните берзи се различни затоа што трговците усвоија дефанзивен став, откако зголемените геополитички ризици во голема мерка ја загрозија довербата“, изјави аналитичарот на компанијата ФХТМ, Лукман Отунуга.
Волстрит го почна тргувањето во плус, а компанијата „Тесла“ го претекна Џенерал моторс (ГМ) по пазарната капитализација и така стана највреден американски производител на автомобили.
Акциите на „Тесла“ скокнаа за повеќе од 3,3 отсто, подигнувајќи ја така пазарната вредност на компанијата на 51,56 милијарди долари, што е за 1,27 милијарди долари повеќе од официјалната цена на ГМ.
Околу 25-та минута од почетокот на тргувањето, индустрискиот индекс Дау Џонс скокна за 0,2 отсто, на 20.707,04 поени, широкиот С&П 500 за 0,3 отсто, на 2.362,77 поени, а технолошкиот Насдак за 0,4 отсто, на 5.899,93 поени.
На валутните берзи, еврото скокна на 1,0597 долари од 1,0587 долари минатиот петок, фунтата на 1,2417 долари, од 1,2400 долари, додека доларот ослабна на 111,23 јени, од 111,33 јени колку што „чинеше“ минатата недела.
Во Азија, токискиот индекс Никеи скокна за 0,7 отсто, на 18.797,88 поени, хонгкошкиот стагнираше на 24.262,18 поени, а шангајскиот падна за 0,5 отсто, наведува АФП.
