Денеска Кривичниот совет на Врховниот суд на седница која ќе биде затворена за јавноста, ќе расправа по барањето на Специјалното јавно обвинителство за законитоста при одлучување за притвор за градоначалникот на општина Пустец, Едмонд Темелко и за одлуката за притвор на градоначалникот на општина Битола, Владимир Талески.
Претходно, судот донесе одлука за случајот со Темелко, но неговата одбрана побара судијката Лидија Неделкова да не биде дел од советот кој ќе донесе одлука.
Поради тоа, во нов состав Кривичниот совет ќе одлучува одново. Во случајот на Талески пак, одново се одлучува бидејќи се оспори тоа што одлучувал судија кој за притворот решавал во Кривичниот па потоа и во Аплецискиот суд откако бил унапреден.
Темелко е осомничен во случајот „Титаник“ кој се однесува на сомневања за изборни нерегуларности извршени во 2013 година, а Талески е првоосомничен во случајот „Транспортер“ за малверзации со превозот на ученици во Битола.
По отворањето на истрагата за случајот, Темелко беше приведен, а на Талески му беше одреден притвор, кој потоа му беше укинат. СЈО поднесе жалба на одлуката.
