Во рамки на дводневната посета на Република Бугарија на делегацијата на Владата на Република Македонија, предводена од премиерот Зоран Заев на 20 и 21 јуни 2017 година, министерот за култура, Роберт Алаѓозовски, оствари средба со бугарскиот министер за култура Боил Банов, соопштија денеска од Министерството за култура.
На средбата било посочено дека соработката во обласка на културата има традиционален карактер и е регулирана со Спогодбата за културна соработка меѓу Владите на двете земји од мај 2000 година, како и со Програмата меѓу двете Министерства, кои се потпишуваат на три години. Во тој контекст, министрите за култура најавија дека најновата програма за соработка во областа на културата за периодот 2017-2019 година ќе се потпише во текот на есента.
Алаѓозовски и Банов разговарале за соработката, која се одвива во сите дејности од културата. Бугарскиот министер Банов, се заложил посебен акцент во идните односи да биде ставен на културниот туризам. Министерот Алаѓозовски истакна дека треба да се унапредат и билатералните проекти, кои се поддржуваат од програмите на Европската Унија. При тоа, тој посочил дека капацитетот на македонско-бугарските партнерства не е искористен во мултилатералните проекти, кои се финансираат од програмата на ЕУ „Креативна Европа“.
Освен на билатерален план, двете земји остваруваат одлична соработка и мултилатерален план, како членки во Меѓународната фондација „Форум на словенските култури“, во Советот на министри од Југоисточна Евроопа, а се реализираат и заеднички проекти во рамките на соработката со УНЕСКО. Во оваа смисла, Алаѓозовски му ја изложил на својот бугарски колега, идејата, Советот на министри да се разбие по добриот пример на Нордскиот совет на министри за култура, кој имаат и заеднички канцеларии и фонд за поддршка на проекти.
На средбата се разговарало и за Иницијативата „16+1“ на Кина и НР Кина и земјите од Централна и Источна Европа, при што министерот Алаѓозовски побарал од министерот Банов и Република Бугарија да ја дадат својата поддршка за предлогот идниот Координативен центар за култуна соработка меѓу овие земји да биде востановен во Скопје. Алаѓозовски инфоримаше дека досега поддршка за отварање на овој Центар во Скопје е добиена од 10 држави, и тоа од Албанија, Босна и Херцеговина, Естонија, Латвија, Литванија, Црна Гора, Полска, Словачка, Словенија и Унгарија, а дека се уште не се изјасниле Бугарија, Хрватска, Чешка, Романија и Србија.
Министерот Банов со задоволство ја поздравил иницијативата, и соопштил дека ќе даде поддршка за овој предлог, се вели во соооштението од Министерството за култура.
