Велика Британија стравува дека нејзините војници во Црна Гора во март оваа година можеле да бидат цел на напад на руски агенти со нервен гас „новичок“, објави британскиот дневен весник „Телеграф“, повикувајќи се на доверливи документи од тамошното Министертство за одбрана.
Според тврдењата на британските власти, руски агенти на 4 март во Салисбери со нервен отров „новичок“ го затруја некогашниот припадник на руските разузнавачки служби Сергеј Скрипаљ кој, како двоен агент, работел за Британците, и неговата ќерка Јулија.
Дваесет денови подоцна, во тридневна посета на пристаништето Бар, вплови разурнувачот на Кралската морнарица ХМС Данкан Д-37, заедно со шпанската фрегата СПС Висторија Ф-28. Тие два брода се дел од сталната НАТО поморска група во Медитеранот, а Данкан е командно пловило.
Воените бродови на НАТО од влегувањето на Црна Гора во Алијансата пред една година, значително почесто отколку порано впловуваат во Бар каде обично минуваат по неколку денови додека нивните екипажи се одмораат и се подготвуваат за задачи.
Таков случајот беше и тој од 23 до 26 март со Данкан, чиј екипаж доби прилика три дена да се одмори во овој црногорски град, забавувајќи се по угостителските локали и посетувајќи ги барските туристички атракции.
„Во СМС пораката која во текот на тридневниот престој на Данкан во Бар била испратена на сите 280 членови на бродскиот екипаж пишувало: Воениот аташе ја извести командата на бродот дека на црногорскиуте власти им е укажано на внимание на група која ќе биде во оваа област вечерва. Затоа сите членови на екипажот кои добија дозвола за излегување во град, мораат да се вратат на бродот најдоцна до 18 часот“, објави весникот „Телеграф“.
Од службата за информирање на британското Министерство за одбрана за весникот потврдиле дека во текот на престојот на разурнувачот во Црна Гора екипажот бил предупреден за можен напад од руски агенти, истакнувајќи дека „безбедносните совети и препораки на сите единици на британската војска, кои се наоѓаат по светот, се базираат на локални проценки за закани и пошироката геостратешка состојба“.
Весникот нагласува дека ниту еден друг воен брод, освен Данкан, не добил слично безбедносно предупредување.
Сепак, тридневниот престој на бродот и неговиот екипаж во Бар кон крајот на март помина во најдобар ред и без каков било инцидент.
Непосредно пред доаѓањето во црногорското пристаниште, Данкан ја предводеше групата од шест НАТО разурнувачи и фрегати која оперираше во Црно море, а каде што, според наводите на „Телеграф“, тогаш ги „предизвикала“ руската војска. Кога воените бродови на Алијансата биле во меѓународните води во близина на Крим, 17 руски борбени авиони ги надлетувале НАТО пловилата на мала висина, но бродовите не го промениле курсот на пловидба.
Данкан е раурнувач чија примарна мисија е противвоздушна одбрана и заштита на пловниот состав од напади на авиони и ракети.
