ВМРО-ДПМНЕ преку соопштение упати нова остра реакција кон лидерот на СДСМ, Венко Филипче, обвинувајќи го дека ја застапува политиката на официјална Софија и дека инсистира на уставни измени кои, според партијата, се спротивни на македонските национални интереси.
Од ВМРО-ДПМНЕ велат дека СДС и Филипче се „тотално изгубени на политичката сцена“, без јасна стратегија, визија и план за развој на државата.
„Единствена политика која ја нудат Венко Филипче и СДС е слугувањето на официјална Софија и застапувањето на туѓи политички агенди. Единствена политика на која жестоко инсистираат е внесувањето на Бугарите во Уставот и прокламирањето уставни измени многу повеќе и од самите барања на Бугарија“, се наведува во реакцијата.
Од партијата тврдат дека СДС и Филипче упорно избираат да бидат гласноговорници на политики кои доаѓаат однадвор, наместо да ги застапуваат интересите на македонските граѓани.
„Филипче и раководството на СДС не ги штитат националните позиции, немаат црвени линии и не ги застапуваат интересите на граѓаните на Македонија. Поданичкиот и капитулантски однос е спротивен на расположението на граѓаните и е една од главните причини за континуираниот пад на довербата во СДС“, наведуваат од ВМРО-ДПМНЕ.
Во соопштение се додава дека СДС нема јасен став кога станува збор за заштита на македонските интереси и дека, според ВМРО-ДПМНЕ, единствената цел е враќање на власт „по секоја цена“.
„СДС и Филипче треба конечно да сфатат дека ниту една политичка кариера и ниту една партиска агенда не смеат да бидат поважни од државните и националните интереси. Сè додека Филипче е најгласниот адвокат на Софија, граѓаните ќе продолжат да ја испраќаат СДС во изолација, порази и на маргините на политичкиот спектар“, се вели во соопштението на ВМРО-ДПМНЕ.
