Бегалскиот камп „Рицона“ во близина на грчкиот остров Евиа од денеска е во 14-дневен карантин, откако беше потврдено дека 20 лица се заразени со Ковид-19, по проверката на контактите на родилката позитивна на коронавирусот, јави дописничката на МИА од Атина.
Од Министерството за миграција и азил на Грција, утрово соопштија дека по наредба на надлежниот министер Нотис Митаракис, а во соработка со заменик-министерот за цивилна заштита и претседателот на Националната здравствена организација, бегалскиот камп во Рицона е во карантин во следните 14 дена.
-Оваа одлука е донесена по резултатите од вчерашната проверка на контактите на потврдениот случај на Ковид-19, кај жена која престојува во кампот, а е хоспитализирана по породувањето во атинска болница. При проверка на 63 лица во кампот во Рицона, беше констатирано дека 20 од нив се позитивни на Ковид-19, соопштуваат од Министерството за миграција и азил на Грција и додаваат дека никој од овие 20 лица немал симптоми, а проверката на контактите ќе продолжи и во текот на денешниот ден
Во вторникот беше потврдено дека жена – барателка на азил, која престојува во организираниот бегалски камп „Рицона“е заразена со коронавирусот, а била тестирана веднаш откако се породила во атинска државна болница.
