Загаден воздухот во Скопје од вчера. Концентрациите на ПМ10-честичките според
мерењата на Министерството за животна средина и просторно планирање во текот
на ноќта достигнале и над 300 микрограми на кубен метар.
Воздухот во Скопје од вчера е повторно со високи концентрации на ПМ10-честички, а според мерењата на Министерството за животна средина и просторно планирање во текот на ноќта достигнале и над 300 микрограми на кубен метар.
Во Центар концентрациите почнале да се зголемуваат од вчераутро, кога биле измерени 58 микрограми на кубен метар, за во 23 часот да достигнат 376 микрограми, од кога почнуваат да се намалуваат, но и натаму се далеку над дозволените. Последното мерење во Центар концентрациите на ПМ10-честичките се 182 микрограми на кубен метар.
Во Карпош се движеле од 60 до 321 микрограми. Последното мерење покажува 196 микрограми на кубен метар.
Кај Ректорат најзагадено било синоќа од 20 до 2 часот по полноќ, кога концентрациите биле над 300, достигнувајќи до 388 микрограми. Утрово се измерени концентрации на ПМ10-честичките од 194 микрограми.
Во Бутел, според мерењата, исто така во текот на ноќта било најзагадено, но концентрациите достигнале до 190 микрограми. Утрово се измерени 120 микрограми на кубен метар.
Загаден воздух е регистриран и во другите градови, а среднодневните концентрации се движеле од 72 од Кочани, 86 во Кавадарци, 96 во Кичево, 106 Миладиновци, 109 во Бутел, 118 во Битола, 128 во Гостивар, 134 во Тетово, 135 во Карпош, 138 во Центар, 171 кај Ректорат до 192 во Струмица.
Според законските прописи, мерки се активираат кога во два последователни дена има среднодневни концентрации над 200 микрограми. Во случај кога има загадување над дозволеното, но под 200 микрограми, во сила се само препораките за користење јавен превоз, возење повеќе лица во едно возило или да не се користи возилото без поголема потреба, да не се користи за затоплување прегорено отпадно масло, лакирани или обоени отпадоци од дрво и мебел, стиропор, ПЕТамбалажа, парчиња гума или кој било друг синтетички материјал, правилно користење на печките на дрва, ограничено движење и активности на отворен простор на најранливата популација, земање витамини…
