По повод Денот на Републиката, на 2 август, Организациониот одбор за прослава најави повеќе настани, свечености, чествувања и обраќања.
Настаните по повод 114 годишнината од Илинденското востание и по повод 73 годишнината од првото заседание на АСНОМ, ќе отпочнат на 2 авуст, во 8 часот, во црквата Свети Спас во Скопје каде што пред присутните гости ќе се обрати премиерот Зоран Заев.
Програмата потоа продолжува со заедничко чествување и со полагање венци со свежо цвеќе на гробот на Гоце Делчев, во дворот на црквата, од страна на Заев и бугарскиот премиер Бојко Борисов.
Свеченостите по повод Денот на Републиката продолжуваат со активностите на претседателот Ѓорѓе Иванов кој во 10 часот ќе положи венци со свежо цвеќе пред спомениците на АСНОМ и на Никола Карев. Во 10 часот и 25 минути, Претседателот Иванов ќе се поклони пред споменикот на првиот Претседател на Президиумот на АСНОМ Методиј Андонов Ченто и ќе има свое обраќање.
Во Меморијалниот центар АСНОМ, во Пелинце, во 11 часот, на свеченоста по повод првото заседание на АСНОМ ќе говори заменикот претседател на Владата задолжен за економски прашања ,Кочо Анѓушев.
Централното одбележување на Денот на Републиката 2 август и државните почести по повод годишнината од Илинденското востание, ќе се одржат на Мечкин Камен во Крушево.
Делегација на Собранието во 9 часот и 30 минути ќе положи свежо цвеќе на гробот на Претседателот на Крушевската Република Никола Карев, а во 10 часот венци свежо цвеќе ќе бидат положени и пред Споменикот на хеорите во месноста Слива Пред почетокот на големиот Народен собир на Мечкин Камен кој ќе отпочне во 12 часот, во храмот Свети Никола ќе биде одржана панихида.
Отворањето на програмата на Народниот собир на Мечкин Камен ќе започне со пристигнувањето и поздравот на коњаницата, по што ќе следува церемонијата на положување свежо цвеќе на Споменикот на бранителите на Крушевската Република и со интонирање на химната.
На Народниот собир пред присутните гости ќе се обрати претседателот на Собранието Талат Џафери. Програмата на Народниот собир потоа ќе продолжи со пригодна културно-уметничка програма.
Лајтмотивот на сите чествувања по повод празникот Денот на Републиката е „Наша Македонија – без разлика на вера, етничка припадност, пол и убедувања.
Бидејќи од дедо– прадедо си живееме како браќа и сестри на оваа земја! За право, за слобода и за човечки живот“, кој е инспириран од Крушевскиот манифест.
