Додека топењето на мразот го проширува просторот за приод на Арктикот, инвеститори од Кина и Канада се се позаинтересирани за изборите на Гренланд закажани за следната недела.
На Гренланд се надеваат дека порастот на цената на добрата и услугите ќе ги привлече странските компании и ќе го забрзаат економскиот раст, за да може, како што наведува Ројтерс, да се оствари долгоочекуваната цел – независност од Данска.
Откако Гренланд оствари високо ниво на автономија од Данска во 2009 година, власта се надеваше дека ќе дојде до „рударски бум“, меѓутоа законските ограничувања и падот на цената на услугите и добрата ги сруши нивните планови.
Економијата во отсуство на „рударскиот бум“ се потпре на рибарење и на донации од Данска, а со оглед на тоа дека оваа година би можел да почне со работа рудник за рубини и сафири, кој го води норвешката „ЛНС група“, агенцијата наведува дека населението повторно се надева на големи инвестиции.
Ројтерс предвидува дека владата која ќе го освои мандатот во вторник, за кога се закажани изборите, ќе мора да се одлучи дали ќе се одалечи од Данска и ќе ги зајакне односите со други држави, вклучувајќи ја Кина.
Кина, според агенцијата, има интереси на Гренланд, поради владиниот план во кој се изнесени амбиции да се формира „поларниот пат на свилата“ и да се искористат транспортните рути направени со глобалното затоплување.
Главните играчи на политичката сцена на Гренланд се социјалдемократската Сјумит партија на премиерот Ким Киелсен и левичарската, инуитска, Атакатгит партија на Сара Олсвиг.
Според последните анкети, најизвесен резултат на изборите е дека овие две партии ќе останат во коалиција.
