Новоизбраните членови на привремениот состав на Државната изборна комисија денеска дадоа свечени изјави во Собранието на Република Македонија.
Претседател на Комисијата е Оливер Дерковски (ВМРО-ДПМНЕ), потпретседател е Дитмире Шеху (ДУИ), а членови се Елизабета Постоловска (ВМРО-ДПМНЕ), Борис Кондарко, Јанаке Витановски и Радица Ристеска (СДСМ) и Енвер Салиу (БЕСА).
Претседателот на Комисијата Дерковски во изјавата за медиуми рече дека комисијата, почитувајќи ги законите и Уставот, ќе постапи и ќе направи сѐ што е во нејзина надлежност за да успее организирањето на референдумот.
„Денес ја дадовме свечената изјава и со тоа го означивме почетокот на работата на ДИК. Очекуваме Собранието исто така да донесе значајни одлуки за работата на ДИК. Доколку се заврши сѐ како што треба, го гледате составот, сѐ се тоа искусни луѓе, од кои повеќето претходно веќе биле и членови, така што сметам дека главната задача ќе ја договориме пред се почитувајќи ги законите и Уставот на Македонија“, рече Дерковски.
Тој се заложи дека ќе работат јавно и транспарентно.
Во однос на Избирачкиот соисок додаде дека тоа е континуирана активност на ДИК и дека новоизбраните членови на Комисијата ќе дадат дополнителен придонес за да се расчистат дилемите околу списокот.
Се очекува наскоро да биде закажана и конститутивната седница.
Новиот состав на ДИК треба да го организира референдумот за името, што треба да се спроведе на есен.
За членовите гласаа пратениците од сите политички партии, а седницата се одржа по деблокирањето на процесот на лидерската средба.
Партиите се договорија привремениот состав на комисијата да биде избран по стариот модел – со членови предложени од партиите со најмногу освоени гласови на последните избори.
(Фото: МИА)
