Украинскиот претседател, Володимир Зеленски, го смени министерот за одбрана Олексеј Резников и побара од парламентот оваа недела да го замени Рустем Умеров, шеф на Фондот за приватизација.
Објавата за смената која Зеленски ја најави во своето ноќно видео обраќање до нацијата, може најсериозно да го потресе украинскиот одбранбен естаблишмент, од почетокот на руската инвазија до сега.
Резников, кој беше именуван за министер за одбрана во ноември 2021 година, помогна да се обезбедат милијарди долари западна воена помош за воени цели, но неговото министерство го следеа обвинувања за корупција, кои тој ги опиша како клевета.
„Решив да го разрешам министерот за одбрана на Украина. Олексеј Резников помина низ повеќе од 550 дена војна. Верувам дека на министерството му требаат нови пристапи и други формати на интеракција со војската и општеството во целина“, рече Зеленски.
Промената на министерот за одбрана мора да биде одобрена од парламентот, но веројатно одлуката ќе ја поддржат мнозинството пратеници на Врховната Рада.
Зеленски истакна дека очекува парламентот да го одобри назначувањето на Умеров.
Умеров, 41-годишен поранешен адвокат и кримски Татар, го води Фондот за државна сопственост на Украина од септември 2022 година и одигра чувствителна улога во воените преговори како што е на пример црноморскиот договор за жито.
