Соединетите Американски Држави одобрија голема продажба на оружје на Грција, нудејќи им четири нови фрегати и голем пакет на модернизација за 9,4 милијарди долари, директно конкурирајќи и на сличната спогодба со Франција.
Американскиот Стејт Департмент соопшти дека во петокот ги одобри потенцијалните договори, најавувајќи ја понудата на неколку бродови (ММСЦ) како додаток на посебниот план од 2,5 милијарди долари за модернизација на грчките фрегати од класата МЕКО.
„Оваа предложена продажба ќе ги поддржи целите на надворешната политика и националната безбедност на Соединетите Американски Држави така што ќе помогне да се подобри безбедноста на сојузниците во НАТО, која е важен сегмент за политичката стабилност и економскиот напредок во Европа“, соопшти Агенцијата за безбедносна соработка во областа на одбраната.
Ако договорот биде направен, модернизацијата на флотата на грчката фрегата би вклучувала инсталација на низа нови системи, како што се нови артилериски топови од пет инчи и надограден нишански систем.
Продавачите на оружје „Локид Мартин“, „Раитеон“, „ВСЕ Корпорација“ и британскиот „БАЕ системс“ би служеле како главни изведувачи.
Најавениот предлог доаѓа откако Франција во септември објави дека постигнала слична спогодба со Грција за да обезбеди до четири нови фрегати за 3,4 милијарди долари (3 милијарди евра). Во тоа време, меѓутоа, портпаролот на француската војска, Евре Гранџан, рече дека, иако некои обврски се превземени, уште не е потпишан официјален договор меѓу двете страни. Додаде и дека работата ќе биде финализирана после период од три месеци, а рокот кој е предвиден за заклучување би требало да истече во следните седмици.
Иако сеуште е нејасно што ќе значи предлогот на САД за француската спогодба, Париз тој потег би можел да го поротолкува како голема навреда. Претходно оваа година Вашингтон веќе го предизвика гневот на Париз откако ја откри спогодбата за нуклеарните подморници со Австралија и покрај веќе постоечкиот аранжман со Франција.
Франција, која требаше да и продаде подморници на Канбера, одговори со отповикување на своите амбасадори од Америка и Австралија, додека претседателот Емануел Макрон остро ги критикуваше двата сојузника во јавноста.
Две недели после „бомбата АУКУС“, Макрон излезе на сцена со грчкиот премиер Киријакос Мицотакис за лично да ја најави продажбата на француските воени бродови на Атина, велејќи дека е време да се „престане да биде наивен“ додека за тој договор рече дека е знак за „стратешка автономија на Европа и суверенитет“.
