Македонија тоне според индексот на медиумски слободи. Државата е рангирана во категоријата неслободни земји.
Се затвараат, се тепаат и се заплашуваат новинари или заради нивна политичка неподобност им се делат откази од работа.
Во целост се деградираше новинарската професија и се загуби довербата кај граѓаните.
Наместо улогата на медиумите да биде слободно и одговорно информирање на јавноста, весниците и телевизиите ги исполнуваат желбите на политичките и економските моќници.
Медиумите не се она што треба да бидат. Тие не се дел од демократскиот процес. Наместо да се контролори на владата и претставници на граѓаните, тие се долгата рака на власта.
Постојано под финансиски притисоци новинарите принудени се уредувачките приоритети да ги усогласат со приоритетите на „политички и економски центри на моќ, а не на јавниот интерес”.
Мешавината на ниски примања кои се исплаќаат доцна, слаба сигурност на работата, работа без договор или со лесно раскинливи договори претставува дополнителен облик на притисок што поттикнува автоцензура, отежнува независност, квалитетно новинарство и фаворизира „таблоизација“.
Медиумската сцена во моментов е во бурен и непредвидлив период на промени и прекројувања.
Под сомнителни околности се продаваат медиуми или заради нерентабилност се затвараат.
Последното од низата скандалозни медиумски случувања е згаснувањето на некогаш многутиражните дневни весници „Утрински весник“ и „Вест“.
Од менаџментот на компанијата „МПМ“ беше истакнато дека весниците ќе излегуваат само во електронска форма и дека повеќето од вработените ќе бидат отпуштени од работа, а затворањето на двата весника го „оправдуваа“ со финансиски загуби.
Актуелно.мк деновиве стаса до документ на којшто е наведен износот на месечни примања на донеодамнешниот прв човек на компанијата, Јана Станисављева.
Во услови кога компанијата се соочувала со финансиски проблеми Станисављева земала месечна плата од неверојатни 25 илјади евра.
Друштвото имало обврска најдоцна до 10-ти во месецот да и исплаќа износ во висина од 1.345.000 денари.
Дополнително, и биле платени трошоци за бензин, за доаѓање и одење од работа, дневници и слично.
Кај правните експерти постои сомневање дека во случајов станува збор за направен штетен договор, односно за направена злоупотреба при склучување на договори со заинтересирани страни.
Соговорниците велат дека одговорно лице во правно лице кое свесно при склучување на договор со заинтересирана страна, ќе ги прекрши законските прописи на начин што ќе предизвика значителна имотна штета на интересите на правното лице, на трети лица или пак ќе предизвика значителна имотна корист ќе биде санкционирано со парична казна, но и со казна затвор од 6 месеци до три години.
Во законот се предвидува и тоа дека за вакво дејство кое што е противзаконско, во случај кога одговорното лице за себе ќе прибави поголема имотна корист или пак ќе го оштети интересот на правното лице позначително, тогаш лицето покрај паричната казна ќе добие и казна затвор од 1 до 5 години.
Дополнително законот предвидува дека доколку во ваков случај, едно лице противзаконски стекне позначителна имотна корист, истото лице ќе биде санкционирано со значителна парична казна.
Деновиве попусти беа обидите да добиеме каков било коментар од Станисављева, која од неодамна е на ново работно место, или од кој било друг од компанијата МПМ.
