Сообраќајот на патиштата низ државата утринава се одвива отежнато и во зимски услови по влажни коловози, наместа со остатоци од кашест снег на коловозот. Поради ниските утрински температури, има и појава на голомразица.
Во целосен прекин е патот меѓу селата Ранковце и Герман, а на неколку други патни правци има забрана за движење за тешки товарни возила.
Авто мото сојузот на Македонија утринава информира дека забрана за камиони има на патот Прилеп-Кавадарци преку планинскиот премин Плетвар, а на патот Тетово-Попова Шапка забраната е за камиони и за автобуси.
Забрани има и на патните правци Битола–Ресен преку планинскиот премин Ѓавато, Крива Паланка-граничен премин Деве Баир, како и крак Маврово-Дебар каде е забрането движење за тешки товарни возила со приколка. Тешки товарни возила не можат да се движат и на патот од Дебар кон Струга, а во спротивен правец од Струга кон Дебар нема забрана.
