Американскиот претседател Доналд Трамп не верува дека Иран успеал да заштити или премести кој било дел од својот збогатен ураниум пред американските напади врз нуклеарните постројки.
Во интервју за Фокс Њуз, Трамп ги отфрли медиумските извештаи дека Техеран можеби преместил одредени залихи на ураниум.
-Тие не преместија ништо, рече Трамп, истакнувајќи дека САД не ги објавиле нападите, па затоа немало време за подготовка.
„Тие не знаеја дека доаѓаме“, рече Трамп, додавајќи дека е исклучително тешко, опасно и логистички сложено да се преместува збогатен ураниум поради неговата тежина.Американскиот претседател тврди дека имало индикации за активност во објектот непосредно пред нападот, но не кажа дали станува збор за Фордо, иако забележа дека станува збор за „длабок“ објект.
-Возила и градежни работници можеа да се видат на местото на настанот. Тоа беа луѓе што истураа бетон. Тие се обидуваа да го запечатат влезот каде што најверојатно ќе влезе бомбата, повтори Трамп.
Според извештајот на Меѓународната агенција за атомска енергија (МААЕ), Иран поседува повеќе од 400 килограми збогатен ураниум со чистота од 60 проценти, што е речиси доволно за производство на оружје. Дипломатите велат дека би можел да се користи за производство на неколку бомби доколку материјалот дополнително се збогати до 90 проценти.
Иранското раководство вели дека не сака да произведува нуклеарна бомба и дека му е потребна нуклеарна енергија за цивилни потреби. Но, многу земји неодамна се загрижени дека земјата наскоро може да произведе нуклеарно оружје
