Крсто Мукоски, Сашо Васиелвски, Јохан Тарчуловски, Љупчо Димовски, Жаклина Пешевска и Љубен Арнаудов се шестмината пратеници за кои Судот од Собранието бара од да им се одземе имунитетот поради тоа што судот треба да донесе одлука за барањето на Јавнто обвинителство за притвор за пратениците, јави ТВ 24.
Неофицијално, Митко Чавков е веќе префрлен во истражниот затвор „Скопје“. Нему, според судски извори, му е определен триесетдневен притвор.
Притвор му е определен и на Игор Дурловски, еден од организаторите на протестите „За заедничка Македонија“.
Во судот утринава беа донесени 24 обвинети, недостасуваат уште 12.
Барањето на Судот за шесте пратеници е адресирано до претседателот Талат Џафери и токму тој ќе се чека утре да се врати од службен пат за да почне процедурата. Во барањето стои:
„Имајќи ја во предвид одредбата од член 64 став 2 од Уставот на Република Македонија, за да може судот да пристапи кон одлучувањето по предлогот на Основното јавно обвинителство за гонење на организираниот криминал и корупција – Скопје, Ви поднесуваме барање за одобрување на притвор на пратениците Крсто Мукоски, Љубен Арнаудов и Јохан Тарчуловски“.
Идентично е барањето од судот и за пратениците Сашо Василевски, Жаклина Пешевска и Љупчо Димовски. На едното барање како судија на претходна постапка е потпишана судијката Весна Димишкова, а на второто Ненад Савески.
Според информациите од Собранието, Комисијата за мандатно имунитетни и деловнички прашања има обезбедено кворум и утре ќе заседава.
Дека Собранието ќе постапи по барањето на Судот кога ќе стигне денеска од Шведска порача и првиот парламентарец.
Џафери посочи и на прекршување на процедурите при приведувањето на пратениците.
„Во контекст на процедурите кои што се пропишани со Устав и со деловникот за работа на Собранието сметам дека има дилеми во однос на почитувањето или не почитувањето до крај на соодветните процедури, апропо одредбите од член 64 од Уставот каде што е стриктно прецизирано, кажано е дека пратеник не може да се лиши од слобода без одобрение од Собранието и оваа одредба после ја процесуира деловникот во деловите од членот 53 до 59 во сите аспекти на спроведувањето на таа одлука на обинителството и во тој контекст сметам дека не се до крај почитувани процедурите во смисла на она што е обврска взаемна на институциите “, вели Талат Џафери – претседател на Собранието.
Според собраниските правила комисијата носи заклучок со мнозинство гласови, но конечниот збор за симнувањето на имунитетот го има Собранието, кое треба во рок од три дена да го усвои извештајот или да го одбие, а за тоа треба да гласаат 61 пратеник.
Во македоската историја Собранието симнувало имунитет досега во неколку случаи -Љубе Бошкоски за Раштански лозја, за Владо Бучковски за случајот Тенковски делови, Хисен Џемаили и Хајрула Мисини кои беа обвинети во дел од хашките случаи.
