Јавниот обвинител Љубомир Јовески реагира на вчерашниот протест на група албански интелектуалци кои бараа да не се преквалификува делото во случајот со смртта на малиот Алмир од Куманово. Тој во денешното писмено соопштение бара политичките партии, онака како што неодамна се заложиле, да стојат понастрана од обвинителството и да ја почитуваат самостојноста на институцијата.
„Апелирам до политичките партии да не вршат притисок и да не се мешаат во вршењето на јавно-обвинителската работа, како што е случајот деновиве. Обвинителите својата работа ја вршат и одлуките ги носат и ќе ги носат исклучиво врз основа на одредбите од законот и изведените докази. Со моето доаѓање на функцијата Јавен обвинител на Република Македонија ветив дека одлуките нема да се носат врз основа на желби на партиските штабови или центри на моќ. Професионализацијата и враќањето на довербата во Обвинителството ми се основни принципи при вршењето на оваа одговорна функција“, се наведува во реакцијата на државниот обвинител.
Јовески апелира при коментирањето и оценките за кривично-правниот настан во кој животот го загуби четиригодишниот Алмир Алиу, да се земат предвид сите докази и факти од целиот настан. Тој потенцира дека само со целосна анализа на доказите ќе се утврдува материјалната вистина и кривичната одговорност.
„Политичките субјекти доколку се сомневаат или имаат забелешки на мојата професионална работа можат да побараат мое разрешување. Додека ја вршам фукцијата Јавен обвинител на Република Македонија, сторителите ќе бидат третирани врз основа на фактите и стореното кривично дело, а не врз основа на етничка или партиска припадност“, напиша обвинителот.
На крајот Јовески децидно побара политичарите да бидат што понастрана
„Политичките партии, без разлика дали се на власт или во опозиција, без разлика на етничка припадност, се заложија дека ќе ги тргнат рацете од Обвинителството, ќе ја почитуваат неговата самостојност и дека се залагаат за вистински реформи во правосудниот систем. Затоа барам, и во случајот кој деновиве ја бранува јавноста, да постапуваат согласно нивните јавно искажани и декларирани принципи. Ве уверувам дека и за трагичниот настан, во кој животот го загуби четиригодишниот Алмир Алиу, се постапува неселективно, непристрасно, професионално и врз основа на законот.
