Америка бара исфрлање на Русија од Советот за човекови права на ОН

LinkSense.mk

САД ќе побара од Генералното собрание на Обединетите нации да ја суспендира Русија од Советот за човекови права, изјави вчера американската амбасадорка во ОН, откако Украина ги обвини руските сили за убиство на десетици цивили во Буча.

Суспензија за грубо и систематско кршење на човековите права може да се изгласа со двотретинско мнозинство од 193 члена, колку што брои Собранието на ОН.

Учеството на Русија во Советот за човекови права е фарса.Тоа е вистинска лакрдија“, рече амбасадорката на САД во ОН, Линда Томас-Гринфилд, за време на посетата на Романија.

Тоа е погрешно, затоа мислиме дека е време Генералното собрание на ОН да изгласа нивно исфрлање“, додаде таа.

Украина објави дека ќе ги искористи сите „достапни механизми на ОН“ за собирање докази за руските злосторства во нивната земја.

Украинскиот министер за надворешни работи, Дмитро Кулеба, изјави дека „нема место за Русија во Советот за човекови права на ОН“.

Амбасадорката на САД рече дека сака гласањето да се одржи оваа недела.

Откако на 24 февруари започна руската инвазија на Украина, Генералното собрание, со 140 гласа „за“, усвои две резолуции со кои се осудува Русија.

Русија и понатаму тврди дека спроведува „специјална воена операција“ на демилитаризација во Украина.

Апелирам до оние 140 земји кои се кренаа храбро: сцените од Буча и пустошењето низ Украина сега бараат од нас да ги преведеме нашите зборови на дело“, им рече амбасадорката Томас-Гринфилд на новинарите во Романија.

Амбасадорот на Русија во ОН, Василиј Небензија, од Њујорк, видно иритиран, рече дека обидот да се исклучи Русија од Советот е „неверојатен“ и дека тој потег нема да помогне во мировните преговори.

Ова е повторно потег без преседан, и со него нема да го олесни помагањето во процесот на мировните преговори меѓу Русија и Украина“, изјави Небензија на прес-конференција.

Тој повтори дека Русија не е одговорна за злосторствата во Буча, велејќи дека презентираните снимки се „наместени“. Најави дека Москва ќе презентира повеќе докази за тоа на состанокот на Советот за безбедност на ОН што треба да се одржи денес.

Украинските власти соопштија дека досега пронашле тела на 410 цивили во областите околу Киев, вклучително и Буча.

Руската војска во последните денови го олабавува обрачот околу Киев и на север за да ја фокусира својата воена офанзива на истокот на земјата.