Во Загреб отворен македонски културен центар

LinkSense.mk

„По Истанбул, Софија, Тирана, Њујорк, Загреб е петтиот македонски културно-информативен центар во светот. Сите центри, набргу по нивното отворање, го положија испитот за нивната оправданост и неопходност. КИЦ во Загреб цели кон висока оценка на тој испит“, соопшти министерката за култура, Бисера Костадиновска-Стојчевска на свеченоста по повод официјалното отворање на центарот во Хрватска.

Костадиновска-Стојчевска пред бројните гости, меѓу кои беше и хрватската министерка за култура и медиуми, Нина Обуљен Коржинек, истакна дека за хрватските граѓани нашата музика, нашата уметност, култура, нашите традиционални вредности имаат посебно место во нивните срца.

„Но, и поради нашите, на кои овој град и оваа земја им се нивна постојана адреса на живеење – овој Центар, ова катче нека биде пократкиот пат до дома и уште една македонска порта кон заедничките културни европски вредности“, нагласи Костадиновска-Стојчевска.

Таа потсети дека Одлуката за основање на КИЦ во Загреб е донесена пред година и половина и упати благодарност до директорката на ова катче на македонската култура во Загреб, Наталија Поповска, која со успех веќе ја реализира и програмата.

„Нашите чувства кон Загреб се уште подлабоки со фактот дека тука, пред 161 година, е отпечатен и првиот Зборник на македонските преродбеници, браќата Димитар и Константин Миладинови, со помош на хрватскиот бискуп и добродетел Јосип Штросмајер. Загреб е и првата станица на долгиот пат на милосрдноста на нашата Гонџа Бојаџиу, за Ватикан светица, за светот Мајка Тереза. Пред 32 години Загреб ја прогласи за свој почесен граѓанин и, како што и самата рече: „ова е градот на мојата разделба со мајка ми и сестра ми и почеток на мојата мисија“, нагласи македонската министерка.

Меѓу другото, посочи дека преку Годишната програма за поддршка на проекти од областа на културата, Министерството за култура со години ги поддржува проектите на Здружението на хрватската заедница во Македонија.

Хрватската министерка за култура и медиуми Нина Обуљен Коржинек изрази задоволство што заедно со македонската министерка за култура го отворија Културно-информативниот центар на Македонија во Загреб, кој, како што рече, ќе биде центар на нови знаења за вредната македонска култура, но и нова платформа за презентација за македонските уметници, во корист на уште поплодна заедничка културна соработка.

„Историјата и културата на хрватскиот и македонскиот народ се испреплетени со делување на истакнати поединци, а денес нашите културни сцени би биле посиромашни без гостувањата и заедничките програми на хрватските и македонските уметници“, рече Обуљен Коржинек.

Свеченото отворање на петтиот македонски КИЦ во светот беше збогатено со изложба на уметнички фотографии „Македонија низ објективот на хрватски фотограф Марио Пуциќ“.

На свеченоста присуствуваа и македонски студенти кои студираат во Хрватска, а беа прочитани и сегменти од драмите на Горан Стефановски кои се преведени на хрватски јазик, како и расказ од Славко Јаневски.